Southport-ódæðismaðurinn Axel Rudakubana, sem í júlí í fyrra stakk þrjár barnungar stúlkur til bana auk þess að særa átta börn til og tvo fullorðna, hlaut í dag 52 ára fangelsisdóm, að lágmarki, og verður því bak við lás og slá til sjötugs – hið minnsta.

Eins og mbl.is greindi frá á mánudaginn játaði sakborningurinn allt á fyrsta degi réttarhaldanna, sem var á mánudaginn, og var málflutningur sækjanda og verjanda því mun umfangsminni en hefði Rudakubana neitað og haldið uppi vörnum.

Frétt af mbl.is

Játaði allt á fyrsta degi

Lét dómari við Sakadóm Liverpool, Liverpool Crown Court, þau ummæli falla að líkast til fengi Rudakubana aldrei um frjálst höfuð strokið á nýjan leik, en honum voru dæmdir samtals þrettán lífstíðardómar. Sagði dómarinn enn fremur að hefði ákærði ekki verið undir lögaldri, sautján ára, þegar hann framdi ódæðið á dansnámskeiði í Southport 29. júlí, hefði dómurinn hljóðað upp á ævilangt fangelsi án nokkurra möguleika á að afplánun lyki fyrir andlát hins dæmda.

Hreykti sér af verkum sínum

Hefði háttsemi Rudakubana haft í för með sér áfall og óbeit breskrar þjóðar og ekki væri örgrannt um að hann hefði komið öllum 26 börnunum, sem á vettvangi voru, fyrir kattarnef hefði honum verið það unnt í atlögu sem varði heilan stundarfjórðung.

Meðan á gæsluvarðhaldi sakborningsins stóð kvaðst hann gleðjast yfir örlögum barnanna er hann réð af dögum og vera ánægður með verk sitt í Southport 29. júlí.

Axel Rudakubana, átján ára gamall, á þess nú kost að koma fyrir reynslulausnarnefnd og beiðast slíkrar lausnar sjötugur að aldri, árið 2077.

Sky News

BBC

The Guardian

Tengdar fréttir

Stunguárás í Southport á Englandi

Játaði allt á fyrsta degi

• Verður ákærður fyrir hryðjuverk
• Katrín geislandi í óvæntri heimsókn
• Karl Bretakonungur tjáir sig um óeirðirnar
• Tveggja ára fangelsi fyrir myndbönd á Instagram

» Fleiri tengdar fréttir

• Blogga um frétt