Samstarf við öfgahægrið „ófyrirgefanlegt“
Setja bókamerki
Olaf Scholz, kanslari Þýskalands, sagði að það yrðu „ófyrirgefanleg mistök“ ef íhaldssama stjórnarandstaðan í landinu myndi ganga í bandalag með þjóðernisflokknum AfD.
„Frá stofnun Sambandslýðveldisins Þýskalands fyrir meira en 75 árum hefur ávallt verið skýr samstaða meðal allra lýðræðissinna á þingum okkar: Við eigum ekki sameiginlegan málstað með öfgahægrinu,“ sagði Scholz í ávarpi sínu á sambandsþingi Þýskalands í dag.
Vilja hafna öllum innflytjendum
Samkvæmt The Guardian hefur stjórnarandstöðubandalag Kristilega demókrataflokksins og Kristilega sósíalsambandsins (CDU og CSU) í Þýskalandi lagt fram tvær tillögur þess efnis að kolvarpa stefnu landsins í útlendingamálum undanfarin ár og herða löggjöf til muna.
Friedrich Merz, leiðtogi CDU, er talinn líklegur til að verða næsti kanslari Þýskalands eftir komandi kosningar þann 23. febrúar.
Tillögurnar krefjast þess að öllum ólöglegum innflytjendum og hælisleitendum verði hafnað, hvaðan sem þeir koma, á öllum níu landamærum Þýskalands við nágrannalönd þess og víkka valdheimildir yfirvalda til að auðvelda höfnunar- og brottvísunarferla.
66% stuðningur frá þjóðinni
Hafa tillögurnar hlotið mikla athygli í ljósi nokkurra árása að undanförnu af hálfu innflytjenda en til að mynda voru 41 árs gamall karlmaður og tveggja ára barn stungin til bana í síðustu viku af afgönskum innflytjenda sem vísa átti úr landi en hann átti einnig við geðrænan vanda að stríða. Ný skoðanakönnun sýnir 66% stuðning við tillögurnar meðal þjóðarinnar.
Ríkisstjórn Scholz hefur lagst gegn tillögum CDU og CSU, sem þeir segja hafa lagst gegn fjölda af þeirra tillögum. Hafði hann þó orð á því að það væri fyrir neðan allar hellur að stjórnarandstöðubandalag CDU og CSU gæfi AfD undir fótinn með það í hyggju að hljóta stuðning þeirra við tillögurnar.
Varaði Scholz því við því að flokkarnir myndu fylgja í fótspor íhaldsflokksins í Austurríki sem hann sagði hafa brotið loforð sín með því að ganga í samstarf með FPÖ-flokknum, austurrískri hliðstæðu AfD.
Bendlaður við nasisma og öfgahyggju
AfD hefur gjarnan verið kenndur við öfgahyggju og er fyrsti róttæki hægriflokkurinn til að vinna fleiri þingsæti í fylkiskosningu frá því á tímum nasistaflokks Hitlers.
Flokkurinn var rekinn úr Bandalagi róttækra hægriflokka í fyrra eftir hrinu hneykslismála en sumir stofnmeðlimir hans og flokksmenn hafa komist í hann krappann fyrir hin ýmsu ummæli sem hafa verið bendluð við gyðingaandúð og nýnasisma.
Til að mynda sagði Alexander Gauland, einn leiðtogi flokksins, Hitler og valdatíð nasista einungis tittlingaskít í sögu Þýskalands í stærra samhengi. Annar flokksmaður, Maximilian Krah, hefur sömuleiðis haldið því fram að ekki allir nasistar hefðu verið stríðsglæpamenn. Var flokksbróður þeirra, Björn Höcke, gert að greiða sekt á síðasta ári fyrir notkun sína á þekktu slagorði nasista „Alles für Deutschland“ eða „Allt fyrir Þýskaland“ í kosningaherferð sinni.
Musk dyggur stuðningsmaður
Auðjöfurinn Elon Musk var sérstakur gestur á kosningafundi flokksins um helgina en hann hefur ítrekað lýst yfir stuðningi við flokkinn, en afstöðu hans til innanríkismála Evrópuþjóða hefur verið lýst sem óvenjulegri og jafnvel óviðeigandi.
Hefur Musk sjálfur hlotið mikla gagnrýni fyrir að heilsa að siði nasista á innsetningardegi Donald Trumps Bandaríkjaforseta í síðustu viku, en sumir hafa komið honum til varnar og sagt einungis um óheppilegar handahreyfingar manns á einhverfurófi að ræða.
Var það ekki til þess fallið að bæta málstað Musks er hann ávarpaði kosningafundinn hjá flokknum umdeilda og sagði allt of mikla áherslu lagða á sektarkennd Þjóðverja yfir syndum fjarlægrar fortíðar.
Fundurinn fór fram í sömu viku og alþjóðlegur minningardagur um helförina, en 80 ár eru liðin frá frelsun þeirra sem haldið var í útrýmingarbúðum nasista í seinni heimsstyrjöldinni. Minningaratburður fór fram í Auschwitz á mánudaginn þar sem síðustu eftirlifendur búðanna voru í brennidepli.
Engin fjárheimild fyrir Fossvogsbrú
Stefna á úrslitatilraun til að höggva á hnútinn
Flugslys í Washington: Enginn fundist á lífi
Togast á um vistarverur í Alþingishúsi
Óttast afleiðingar af skertu aðgengi
Þrír tálbeituhópar sem tala sig saman
/frimg/1/54/55/1545533.jpg)
Sakaði bróður sinn ranglega um kynferðisbrot
Gul viðvörun um allt land alla helgina