Erlent | AFP | 16.2.2025 | 20:32 | Uppfært 17.2.2025 11:49

Netanjahú segist tilbúinn að „opna hlið heljar“

„Við ræddum djarfa sýn Trumps fyrir framtíð Gasastrandarinnar og við munum vinna til að sjá til þess að sú sýn verði að veruleika,“ sagði Netanjahú í dag. AFP

Bandaríkin og Ísrael eru með „sameiginlegt plan“ fyrir framtíð Gasastrandarinnar að sögn forsætisráðherra Ísraels, sem hét því í dag að „hlið heljar yrði opnað“ ef Hamas-samtökin skiluðu ekki öllum gíslum úr haldi sínu.

Marco Rubio, utanríkisráðherra Bandaríkjanna, er nú í Ísrael þar sem hann ræðir við Benjamín Netanjahú forsætisráðherra landsins. Rubio er í sinni fyrstu opinberu heimsókn til Mið-Austurlanda sem utanríkisráðherra.

„Hamas má ekki halda áfram sem hernaðarafl eða ríkisstjórnarafl [...] Það þarf að taka þá úr leik,“ sagði Rubio en þeir Netanjahú fluttu hvort sitt ávarpið eftir fund sinn í dag.

Í orðum Netanjahús virðist heyrast bergmál af ummælum Donalds Trumps, sem sagði fyrr í vikunni að „allt færi til helvítis“ ef gíslunum yrði ekki sleppt á laugardag. AFP

370 frelsaðir í gær

Í gær frelsaði Hamas þrjá gísla úr haldi sínu gegn frelsun 369 palestínskra fanga úr ísraelskum fangelsum. Eru þetta sjöttu fangaskiptin af þessu tagi samkvæmt vopnahléssamningi Hamas og Ísraels.

Hamas-liðar og Ísraelsmenn hafa sakað hvor aðra um brot á vopnahléssamþykktinni. Á morgun fundar þjóðaröryggisráð Ísraels um næsta kafla samkomulagsins.

Netanjahú hét því í ávarpi sínu í dag að „hlið heljar yrði opnað“ ef Hamas-samtökin skiluðu ekki öllum gíslunum. Þar virðist heyrast bergmál af ummælum Donalds Trumps sem sagði fyrr í vikunni að „allt færi til helvítis“ ef gíslunum yrði ekki sleppt á laugardag.

Frétt af mbl.is

Þremur ísraelskum gíslum sleppt

„Eina planið er plan Trumps“

Trump hefur auk þess lagt til að Ísrael gefi Bandaríkjamönnum Gasaströndina og að finna þurfi nýtt heimili fyrir íbúa á Gasa í Jórdaníu og Egyptalandi.

Tillögurnar hafa sætt þungri gagnrýni frá alþjóðasamfélaginu, einnig frá Íslandi þar sem Kristrún Frostadóttir forsætisráðherra lýsti í gær „algjörri andstöðu“ við þvingaða brottflutninga af Gasa.

Frétt af mbl.is

Lýsa „algjörri andstöðu“ við brottflutning Gasabúa

Ísraelsmenn taka þó vel í tillögurnar.

„Við ræddum djarfa sýn Trumps fyrir framtíð Gasastrandarinnar og við munum vinna til að sjá til þess að sú sýn verði að veruleika,“ sagði Netanjahú í dag.

Fram að þessu höfðu Bandaríkjamenn sagst opnir fyrir öðrum tillögum en Rubio sagði í dag að „eina planið væri plan Trumps“.