Setja fram plan um „endurhervæðingu Evrópu“
Setja bókamerki
Tengdar fréttir
Úkraína
Ursula von der Leyen, forseti framkvæmdastjórnar Evrópusambandsins, hefur sett fram fimm ára plan til að safna samtals 800 milljörðum evra til að verja í varnir fyrir Evrópu og aðstoða við aðkallandi hernaðaraðstoð við Úkraínu eftir að Bandaríkin gerðu hlé á allri hernaðaraðstoð við Úkraínu.
„Nýtt tímabil er runnið upp,“ sagði von der Leyen í bréfi til leiðtoga Evrópusambandsríkja þar sem hún kynnti planið.
Tilkynnt var um það í gær að Donald Trump Bandaríkjaforseti hefði gert hlé á allri hernaðaraðstoð til Úkraínu, en með því stöðvast allur flutningur hergagna frá Bandaríkjunum til Úkraínu. Allt frá innrás Rússa inn í Úkraínu fyrir þremur árum hafa Bandaríkjamenn verið helstu stuðningsmenn Úkraínumanna.
Þessi aðgerð Trumps kemur í kjölfar viðræðna hans við Volodimír Selenskí, forseta Úkraínu, í Hvíta húsinu þar sem upp úr sauð og endaði með því að Trump vísaði Selenskí á dyr.
Sagði von der Leyen jafnframt að Evrópa stæði nú frammi fyrir ógn sem ekkert þeirra hefði upplifað á sínum fullorðinsárum.
Endurhervæðing Evrópu
Planið, sem gengur undir heitinu Endurhervæðing Evrópu (e. ReArm Europe), gengur út á að Evrópusambandsríki verji nálægt 800 milljörðum evra, eða sem nemur 121.300 milljörðum íslenskra króna, í aukin varnarútgjöld.
Fyrsti hluti plansins gengur út á að auka aðhald ríkjanna í ríkisfjármálum þannig að þau geti aukið útgjöld til varnarmála.
Sagði von der Leyen að þessi aðgerð myndi leiða til þess að ríkin gætu bætt verulega í á varnarútgjaldahliðinni án þess að það myndi leiða til mikils hallareksturs.
150 milljarða evra lánalína
Næsta skref er svo 150 milljarða evra lánalína til aðildarríkjanna til að verja í varnarmálafjárfestingar.
Sagði hún að planið gengi út á að verja fjármunum betur og að verja þeim saman. Sagði hún að með þessu gætu Evrópusambandsríkin aukið stuðning sinn við Úkraínu gríðarlega.
Þriðja skrefið er svo að ríkin myndu samþykkja að nota meira af fjármunum Evrópusambandsins í fjárfestingar í varnarmálum.
Tengdar fréttir
Úkraína
Forseti Alþingis: „Það er alvanalegt“
Skólahúsnæðið entist aðeins í 22 ár
Frelsi Evrópu er ógnað á ný
Náist samkomulag verður loksins farið í útboð
Fá ekki frekari bætur þrátt fyrir galla og myglu
Vandamál að þurfa áfengi til að slaka á
Lögreglunni á Suðurlandi falin rannsókn PPP-málsins