Vopnaður maður yfirbugaður af farþega og flugmanni

Karlmaður vopnaður skotvopni og hnífi var yfirbugaður af farþega og flugmanni um borð í flugvél Jetstar í Ástralíu.

Maðurinn var klæddur upp sem viðgerðarmaður og var síðar handtekinn á Avalon-flugvellinum í Viktoríuríki.

Sky News greinir frá því að lögreglan hafi fengið tilkynningu um atvikið klukkan 14.50 í dag þegar maðurinn reyndi að fara um borð í vélina. Skipulagður brottfarartími vélarinnar, sem var á leið til Sydney, var 14.55.

Var kominn inn í vélina

Í tilkynningu lögreglu segir að maðurinn hafi verið handtekinn áður en hann fór um borð. Á myndefni úr flugvélinni má sjá farþega og flugmann vélarinnar yfirbuga manninn þar sem hann er kominn inn í vélina.

Maðurinn er sagður hafa farið um borð í flugvélina undir því yfirskyni að hann þyrfti að sinna viðgerðum. Farþegar og áhöfn, þar á meðal flugmaðurinn, tóku þá eftir vopnum sem maðurinn var með á sér.

Maðurinn var í kjölfarið yfirbugaður af farþega í fremstu röð og flugmanninum, að sögn sjónarvotta.

• Blogga um frétt