Erlent | AFP | 8.3.2025 | 18:41 | Uppfært 19:32

Á þriðja tug látnir er árásum fjölgar í Úkraínu

Á þessari ljósmynd sem viðbragðsaðilar í Úkraínu gáfu frá sér má sjá íbúðarhúsnæði í ljósum logum. AFP

Að minnsta kosti 25 manns hafa látið lífið í nýrri árásahrinu Rússa í Úkraínu, að sögn Úkraínumanna, en árásum hefur fjölgað síðustu vikuna.

Stærsta árásin var á Donétsk-svæðinu en hún varð 11 manns að bana auk þess sem um 40 særðust, þar á meðal sex börn. Þar skutu Rússar tveimur flugskeytum sem hæfðu átta íbúðabyggingar og verslunarkjarna.

Eftir að viðbragðsaðilar mættu skutu Rússar annarri eldflaug og „miðuðu viljandi á björgunarfólkið“ að sögn Volodimírs Selenskís Úkraínuforseta. „Slíkar árásir sýna að markmið Rússa eru óbreytt,“ bætti hann við.

Rússar hæfðu auk þess heimili og innviði í árásum í Karkív og Odesa en alls féllu níu manns í árásum á öðrum svæðum í gær og í dag. Á sama tíma heldur Úkraína áfram með gagnárásir sínar en varnarmálaráðuneyti Rússa segist hafa skotið niður 31 dróna í nótt.

Frétt af mbl.is

Selenskí þakkar Frökkum eftir árásir Rússa í nótt

Að eiga við „barbara“

Árásum Rússa hefur fjölgað á síðustu dögum eftir að Bandaríkin frystu hernaðaraðstoð til Úkraínu og hættu að deila leyniþjónustugögnum með landinu.

Gerðist það í framhaldi af hitafundi Donalds Trumps Bandaríkjaforseta, J.D. Vance varaforseta og Selenskí í síðustu viku.

Donald Tusk, forseti Póllands, hefur brugðist við árásunum á X. „Þetta er það sem gerist þegar einhver lætur undan kröfum barbara,“ skrifar Pólverinn.

„Fleiri sprengjur, fleiri árásir, fleiri fórnarlömb.“

Frétt af mbl.is

Þrír drepnir og á fjórða tug særðir í heimabæ Selenskís

Að minnsta kosti 11 manns létust í einni árás í Dobropillia í Donétsk. AFP

Trump: Kannski auðveldara að eiga við Rússland

Bandaríkjaforseti sagði á blaðamannafundi í gær að það „gæti verið auðveldara að eiga við Rússland“ um að binda enda á stríðið í Úkraínu. Trump sagðist enn fremur trúa því að Pútín vildi semja um frið.

Þetta sagði forsetinn aðeins nokkrum klukkustundum eftir að hafa sagst „sterklega íhuga“ að beita Rússa refsiaðgerðum og tollum, eftir að þeir höfðu gert umfangsmiklar árásir á Úkraínu um nóttina.

Eftir að stefnubreyting Bandaríkjanna í málefnum Úkraínu varð ljós hófst samkvæmisleikur í Evrópu, þar sem hver þjóð á fætur annarri vígbýr sig. Danir hafa aukið framlög til varnarmála og Pólverjar hyggist láta alla fullorðna karlmenn fara í herþjálfun.

Tusk segir að Pólland eigi að kanna kjarnorku „möguleika“.