Ríkisstjórn í fæðingu: Vilja efla landamæraeftirlit

Friedrich Merz, tilvonandi kanslari Þýskalands, segir Kristilega demókrata (CDU) og Jafnaðarmenn hafa náð saman um myndun nýrrar ríkisstjórnar.

Flokkarnir sammælast í þremur helstu málefnum; hælisleitendamálum, efnahagsmálum og vinnumarkaðsmálum.

Merz, sem er formaður íhaldsflokksins CDU, tilkynnti þetta á blaðamannafundi í dag en viðræðum er þó ekki lokið.

Búist er við því að Merz verði næsti kanslari þar sem CDU bar sigur úr býtum í þingkosningum í febrúar en fráfarandi kanslari, Olaf Scholz, er úr röðum jafnaðarmanna.

Frétt af mbl.is

Merz vill hefja viðræður við flokk Scholz

Útlendingar í brennidepli kosninganna

Merz sagði á blaðamannafundi í dag að flokkarnir hygðust draga úr fjölda innflytjenda sem kæmi til landsins og að Þýskaland myndi „stórefla landamæraeftirlit“ á fyrsta starfsdegi ríkisstjórnarinnar.

Óskráðum innflytjendum, þar á meðal flóttamönnum, yrði vísað frá á landamærunum.

Heitar umræður sköpuðust um útlendingamál í kosningabaráttunni í febrúar og hrina árása þar sem bílum var ekið í hóp gangandi vegfarenda bætti olíu á bálið, þar sem útlendingum var kennt um.

Þetta varð til þess að auka fylgi róttæka hægri öfgaflokksins Alternative für Deutschland (AfD) en flokkurinn hlaut um 20% atkvæða. En Merz, sem og framá­menn í öðrum flokk­um, hét því að halda AfD frá völd­um.

• Blogga um frétt