Tvöfaldar boðaða tolla á Kanada
Setja bókamerki
Donald Trump Bandaríkjaforseti tilkynnti í dag að hann myndi tvöfalda fyrirhugaða tolla á ál og stál frá Kanada og verða tollarnir því 50%.
Um miðnætti í kvöld eiga að taka gildi 25% tollar á innflutning á stáli og áli en Trump kveðst hafa ákveðið að hækka tolla á Kanada enn frekar í ljósi þess að Ontario-fylki ákvað að svara fyrstu tollum Trumps með því að selja Bandaríkjamönnum rafmagn á 25% hærra verði.
Kanada er einn nánasti bandamaður Bandaríkjanna og stunda þjóðirnar mikil viðskipti. Helmingurinn af öllu innfluttu áli í Bandaríkjunum kemur frá Kanada og 20% af öllu innfluttu stáli í Bandaríkjunum kemur frá Kanada.
Hótar að knésetja bílaiðnað Kanada
Eftir að Trump boðaði 25% tolla á Kanada svaraði Ontario-fylki með því að hækka verð á rafmagni sem þeir selja til Bandaríkjanna, og ríki í norðurhluta Bandaríkjanna reiða sig á, um 25%.
Trump sagði í dag að ef ekki yrði fallið frá þessari verðhækkun þá myndi hann stórauka tolla á bifreiðar frá Kanada 2. apríl.
Þetta myndi „í meginatriðum loka fyrir bílaframleiðslu í Kanada til frambúðar,“ sagði Trump.
Ítrekaði vilja sinn um að innlima Kanada í Bandaríkin
Trump sagði að það eina skynsamlega í stöðunni væri að Kanada yrði 51. ríki Bandaríkjanna.
„Þetta myndi gera það að verkum að allir tollar, og allt annað, myndu alveg hverfa. Skattar verða lækkaðir mjög verulega, Kanadamenn verða öruggari, hernaðarlega og að öðru leyti, en nokkru sinni fyrr. Það yrði ekki lengur vandamál á norðurlandamærunum,“ sagði Trump.
Úkraína og Bandaríkin ræða um vopnahlé að hluta
Líkið sagt hafa fundist í Gufunesi
„Bendir margt til að verðbólga sé að hækka úti“
Maðurinn sem fór í sjóinn við Akraneshöfn á batavegi
Ný stefna í öryggismálum og ómannaður kafbátur
„Erum ekki aftur að fara í núll eða neikvæða vexti“
Bjarni: Taldi bestu leiðina alltaf að leita samninga