Boðað til skyndikosninga í Portúgal

Forseti Portúgals hefur boðað til skyndikosninga eftir að Luis Montenegro, forsætisráðherra landsins, sagði af sér vegna ágreinings um hagsmunaárekstra.

Kosningarnar verða haldnar 18. maí og verða þriðju kosningarnar á rétt rúmum þremur árum í Portúgal.

Marcelo Rebelo de Sousa, forseti Portúgals. AFP

Marcelo Rebelo de Sousa, forseti landsins, sagði að hann vildi bregðast hratt við til að forðast langvarandi óstöðugleika og bætti við í sjónvarpsávarpi að 18. maí væri sá dagur sem flokkarnir væru sáttir við.

Rebelo de Sousa hafði fundað með leiðtogum flokkanna í gær og fyrr í dag boðaði hann til fundar með ríkisráðinu, sem samanstendur aðallega af stjórnmálaleiðtogum, til samráðs áður en þingi yrði slitið.

Enginn vildi kosningar

Forsetinn sagði að enginn hefði átt von á þessum kosningum eða viljað þær á tímum erfiðra alþjóðlegra átaka.

Hann hvatti flokkana til að einbeita sér í kosningabaráttunni að vandamálum „sem valda Portúgölum áhyggjum í daglegu lífi“ eins og efnahagsmálum og heilbrigðisþjónustu.

• Blogga um frétt