Bjóða peninga fyrir undirskriftir

America Pac, herferðarhópur Elon Musks, segist munu gefa kjósendum í Wisconsin-ríki 100 dollara, eða rúmlega 13.000 krónur, setji þeir nafn sitt á undirskriftarlista sem er gegn aðgerðasinnuðum dómurum.

Herferðarhópurinn var stofnaður til að styðja við Donald Trump Bandaríkjaforseta í kosningunum vestanhafs á síðasta ári. 

Þá fá kjósendur sömu upphæð í hvert skipti sem þeir vísa á aðra sem einnig setja nafn sitt á listann.

Eru kjósendur hvattir til að skrifa undir fyrir 1. apríl, en þá verður kosinn nýr hæstaréttardómari í ríkinu.

Alríkisdómarar gert Trump erfitt fyrir

Hafa alríkisdómarar í Bandaríkjunum gert Trump erfitt fyrir að koma stefnumálum sínum í gegn síðan hann tók við embætti forseta.

T.a.m. bannaði alríkisdómarinn James E. Boasberg Trump-stjórninni að notast við tvö hundruð ára gömul stríðslög til að senda útlendinga úr landi 15. mars. Þrátt fyrir það sendu Bandaríkin rúmlega 200 meinta glæpamenn til El Salvador.

Á þriðjudag kallaði Trump Boasberg m.a. vandræðagemling og æsingamann.

Frétt af mbl.is

Forsetanum settur dómstóllinn fyrir dyrnar

Eiga að túlka lög eins og þau eru skrifuð

Styður America Pac við íhaldssama frambjóðandann Brad Schimel í kosningunni um dómarasætið.

„Dómarar ættu að túlka lög eins og þau eru skrifuð, ekki endurskrifa þau svo þau henti þeirra persónulegu eða pólitísku stefnum,“ skrifar herferðarhópurinn í færslu á X.

Þetta er ekki í fyrsta skipti sem hópurinn býður kjósendum peninga fyrir undirskrift en sérfræðingar hafa talið að slíkt útspil sé ólöglegt.

Frétt af mbl.is

Býður kjósendum pening gegn undirskrift

• Blogga um frétt