Erlent | mbl | 26.3.2025 | 14:14 | Uppfært 27.3.2025 12:03

The Atlantic birtir Signal-samskiptin

Ritstjórn The Atlantic hefur ákveðið að birta samskipti sem fóru fram í spjallhópi á forritinu Signal milli háttsettra bandarískra ráðgjafa og ráðherra daginn sem Bandaríkjamenn gerðu loftárásir á Húta í Jemen.

Greint hefur verið frá því að Jeffrey Goldberg, ritstjóra The Atlantic, var óvart bætt í spjallhópinn, sem bar heitið „Houthi PC Small Group“. Um var að ræða stýrihóp æðstu embættismanna í varnarmálum Bandaríkjanna. Svo virðist sem Mike Waltz þjóðaröryggisráðgjafi hafi verið sá sem bauð Goldberg í hópinn.

Goldberg fjallaði um atvikið í grein sem The Atlantic birti á mánudag og í dag hefur ný grein verið birt undir yfirskriftinni: Hér eru hernaðaraðgerðirnar sem ráðgjafar Trumps deildu á Signal.

Frétt af mbl.is

„Þið hljótið að vera að grínast í mér“

Donald Trump, forseti Bandaríkjanna, hefur sagt að mistök hafi verið gerð en að engar viðkvæmar upplýsingar hafi verið birtar. AFP

Sögðu að engar viðkvæmar upplýsingar hefðu verið í spjallinu

Embættismennirnir sátu fyrir svörum bandarískra öldungadeildarþingmanna í gær þar sem fjallað var um málið og þeir m.a. sakaðir um afglöp í starfi. Ríkisstjórnin og Trump Bandaríkjaforseti hafa gert lítið úr málinu og talað um það sem minni háttar mistök. Pete Hegseth, varnarmálaráðherra Bandaríkjanna, sagði að enginn hefði birt viðkvæmar upplýsingar um hernaðaraðgerðir.

Frétt af mbl.is

Trump: Minniháttar feill

Frétt af mbl.is

Waltz „tekur fulla ábyrgð“ á neyðarlegu mistökunum

Á þinginu í gær voru þau Tulsi Gabbard, sem er yfirmaður leyniþjónustustofnana Bandaríkjanna, og John Ratcliffe, yfirmaður CIA, spurð út í Signal-samtalið. Þar sagði Gabbard við nefndarmenn í leyniþjónustunefnd öldungadeildarinnar að engu trúnaðarmáli hafi verið deilt í þessum samskiptum.

Ratcliffe tók í svipaðan streng. „Samskipti mín í Signal-spjallhópnum voru algjörlega heimil og lögleg og innihéldu ekki trúnaðarupplýsingar.“

Trump Bandaríkjaforseti var einnig spurður um sama mál síðdegis í gær og þá sagði hann: „Þetta voru ekki trúnaðarupplýsingar.“

Pete Hegseth, varnarmálaráðherra Bandaríkjanna. AFP

The Atlantic bregst við

Ritstjórn The Atlantic segir að yfirlýsingar stjórnvalda setji blaðið í klípu. Hún bendir á að í upphaflegri frétt The Atlantic um Signal-spjallið hafi ákveðnum upplýsingum í sambandi við vopn og tímasetningu árása, sem þeir hafi séð í skilaboðunum, verið haldið leyndum. Ritstjórnin segir að það sé regla að birta ekki upplýsingar um hernaðaraðgerðir ef þær gætu mögulega stofnað lífi Bandaríkjamanna í hættu. Þess vegna hafi blaðið fremur kosið að lýsa eðli upplýsinganna sem deilt var án þess þó að fara í öll smáatriði.

„Yfirlýsingar Hegseth, Gabbard, Ratcliffe og Trump - ásamt fullyrðingum fjölmargra embættismanna stjórnarinnar um að við séum að ljúga um innihald Signal-skilaboðanna - hafa leitt til þess að fólk eigi að sjá skilaboðin svo það geti dregið sínar eigin ályktanir. Það eru skýrir almannahagsmunir fólgnir í því að birta þær upplýsingar sem ráðgjafar Trumps hafa birt á óöruggum samskiptarásum, sérstaklega þar sem háttsettir embættismenn stjórnarinnar reyna nú að gera lítið úr mikilvægi skilaboðanna sem deilt var,“ segir í umfjöllun The Atlantic.

Þjóðaröryggisráðgjafinn Mike Waltz hefur sagt að hann beri fulla ábyrgð á því að blaðamanninum hafi óvart verið bætt við spjallhópinn. AFP

Ógnar þjóðaröryggi

Þar segir enn fremur að sérfræðingar hafi ítrekað bent á að notkun Signal-spjalls fyrir svo viðkvæmar umræður ógni þjóðaröryggi.

„Nefna má sem dæmi að Goldberg fékk upplýsingar um árásirnar tveimur klukkustundum áður en áætlað var að hefja sprengjuárásir á staðsetningar Húta. Ef þessar upplýsingar - sérstaklega nákvæmar tímasetningar þegar bandarískar flugvélar voru að hefja sig til flugs til Jemen - hefðu lent í röngum höndum á þessu mikilvæga tveggja klukkustunda tímabili, hefðu bandarískir flugmenn og annað bandarískt starfsfólk getað verið í enn meiri hættu en þeir standa vanalega frammi fyrir. Ríkisstjórn Trumps heldur því fram að hernaðarupplýsingarnar í þessum skilaboðum hafi ekki verið trúnaðarmál – eins og þær eru alla jafna – þó að forsetinn hafi ekki útskýrt hvernig hann komst að þeirri niðurstöðu.“

Tulsi Gabbard, sem er yfirmaður leyniþjónustustofnana Bandaríkjanna, og John Ratcliffe, yfirmaður CIA, voru spurð spjörunum úr á fundi leyniþjónustunefndar þingsins í gær. AFP

Hvíta húsið mótmælti birtingunni

Ritstjórn The Atlantic hafði samband við marga embættismenn í stjórn Trumps og spurði hvort þeir gerðu athugasemdir við birtingu samskiptanna í heild, í ljósi þess að ekki væri um trúnaðarupplýsingar að ræða.

Ritstjórnin fékk tölvupóst seint í gærkvöldi frá Karoline Leavitt, sem er fjölmiðlafulltrúi Hvíta hússins. Þar er ítrekað að engar trúnaðarupplýsingar hafi verið birtar í þessu spjalli en um leið var birtingunni mótmælt.

Talsmaður CIA hafði einnig samband og óskaði eftir því að nafn yfirmanns starfsliðs CIA yrði ekki birt opinberlega í umfjölluninni.