Slæmt ástand í borginni: Kastar upp vegna lyktar

Um 17.000 tonn af sorpi hafa safnast saman á götum Birmingham í Englandi eftir að starfsmenn sorphirðu borgarinnar hófu verkfallsaðgerðir fyrir tæpum mánuði. Hækkandi hitastig hefur gert slæmt ástand enn verra.

Sorphirðubílar sjást nú afar sjaldan á götum borgarinnar, og samkvæmt fréttaveitu AFP reyna íbúar í örvæntingu að losa sig við sorpið sem hefur hrannast upp síðustu vikur, hvenær sem tækifæri gefst.

Rottur og refir róta í haugunum

Margir íbúar telja að ástandið hafi náð nýjum botni nú þegar vorsólin hefur látið sjá sig, þar sem sterk lykt berst frá sorpinu. Ekki bætir úr skák að rottur og refir róta í haugunum í leit að æti.

Borgaryfirvöld hafa undirstrikað alvarleika málsins, á meðan íbúar segja að ástandið fari sífellt versnandi.

„Það varð eldsvoði í enda götunnar okkar um daginn,“ segir Abel Mihai, 23 ára íbúi í Saltley-hverfi borgarinnar, þar sem sorphaugar hafa dregið að sér alls kyns skordýr.

Mihai segir ástandið nú farið að hafa áhrif á heilsu þriggja ára sonar síns.

„Í hvert skipti sem hann fer út, kastar hann upp út af lyktinni.“

AFP

• Blogga um frétt