Lögregla: Atvikið í Vancouver „ekki hryðjuverk“

Fjöldi fólks er lát­inn eft­ir að bíl var ekið á mannþvögu á götu­hátíð í Vancou­ver í Kan­ada í nótt. Lög­reglu grun­ar ekki að at­vikið hafi verið hryðju­verk.

Þrítug­ur ökumaður er í varðhaldi vegna máls­ins að sögn yf­ir­valda. Lög­reglu­yf­ir­völd segj­ast kann­ast við hann frá fyrri mál­um.

„Á þess­um tíma­punkti erum við sann­færð um að þetta hafi ekki verið hryðju­verk,“ skrif­ar lög­regl­an á X.

Ná­kvæm­ur fjöldi fórn­ar­lamba ligg­ur ekki fyr­ir en lög­regl­an í Vancou­ver sagði að „fjöldi fólks“ hefði látið lífið og „marg­ir aðrir“ særst eft­ir að ökumaður­inn ók inn í fólks­fjölda á götu­hátíð við Fraser-stræti upp úr kl. 20 að staðar­tíma (3 að ís­lensk­um tíma).

Frétt af mbl.is

Fjöldi lést er bíl var ekið á fólk í Vancou­ver

„Lík út um allt“

At­vikið átti sér stað á Lapu Lapu-hátíðinni í Vancou­ver, sem er hald­in ár­lega af Flipps­ey­ing­um um víða ver­öld til heiðurs sam­nefndri frels­is­hetj­u sem sigraði Spán­verja í orr­ust­unni við Mact­an árið 1521.

Fjöl­skyldu­hátíðin var við það að ljúka þegar svört­um jepp­lingi var skyndi­lega ekið inn í miðja þvög­una. Á ljós­mynd­um af vett­vangi sem eru í dreif­ingu á sam­fé­lags­miðlum má sjá að fram­hlið bíls­ins er gjör­ónýt eft­ir at­vikið. Aðrar mynd­ir sýna lík á víð og dreif um svæðið. 

Staðarmiðill­inn Vancou­ver Sun ræddi við Abigail And­iso, sem var ásamt vin­um sín­um í ná­gren­inu er hún heyrði tvo hvelli, og síðan ösk­ur.

Þegar And­iso hljóp í átt að hávaðanum blasti hryll­ing­ur við. „Það voru lík á göt­unni. Það hafði verið keyrt yfir þau,“ seg­ir hún. „Sum­ir voru þegar dán­ir á staðnum.“

Yoseb Var­deh, sem rak mat­ar­vagn á svæðinu meðan á hátíðinni stóð, seg­ir við Post­media að dag­ur­inn hafði verið „ótrú­leg­ur“ fram að þessu. Hann lýs­ir því að hann hafi heyrt í öku­mann­in­um gefa í. 

„Og svo lít ég upp og sé fólk fljúga,“ er haft eft­ir hon­um. „Ég fer út úr mat­ar­vagn­in­um, ég lít niður veg­inn og það eru bara lík út um allt.“

„Við syrgj­um öll með ykk­ur“

Ken Sim, borg­ar­stjóri Vancou­ver, seg­ist á X vera sleg­inn yfir at­vik­inu. For­sæt­is­ráðherra lands­ins er einnig harmi sleg­inn.

„Ég er miður mín við að heyra af hræðilega at­b­urðinum á Lapu Lapu-hátíðinni í Vancou­ver,“ skrif­ar Mark Car­ney, for­sæt­is­ráðherra Kan­ada, á X.

„Við syrgj­um öll með ykk­ur,“ bæt­ir ráðherr­ann við.

Svipuð árás átti ný­lega sér stað í New Or­le­ans í Banda­ríkj­un­um í byrj­un janú­ar, þegar 15 lét­ust er maður ók pall­bíl í gegn­um mann­fjölda í Bour­bon-stræti.

• Blogga um frétt