Erlent | AFP | 10.5.2025 | 0:14 | Uppfært 0:39

Skiptast á eldflaugaárásum

Mótmælendur í Pakistan brenna hér eftirmynd af Narendra Modi, forsætisráðherra Indlands. AFP/Husnain Ali

Indverjar og Pakistanar hafa nú í kvöld skipst á eldflaugaárásum. Pakistanski herinn sakaði fyrr í kvöld Indverja um að hafa skotið eldflaugum á þrjá af herflugvöllum sínum, en þar af var einn í nágrenni Islamabad, höfuðborgar Pakistans.

Ahmed Sharif Chaudhry, undirhershöfðingi og talsmaður pakistanska hersins, sagði að Indverjar hefðu skotið eldflaugum á bækistöðvar Pakistana í Nur Khan, Murid og Shorkot. „Nú skuluð þið bara bíða eftir svari okkar,“ sagði Chaudhry og beindi orðum sínum til Indlands.

Nur Khan-herflugvöllurinn er í Rawalpindi, en þar eru jafnframt höfuðstöðvar pakistanska hersins. Er bækistöðin um 10 kílómetrum frá Islamabad.

Stjórnvöld í Pakistan hafa nú lokað lofthelgi landsins fram til kl. 7 að morgni laugardags að íslenskum tíma, og sögðu ríkisfjölmiðlar þar í landi nú um miðnætti að íslenskum tíma að svar Pakistana við árásum Indverja væri hafið.

Munu Pakistanar m.a. hafa skotið eldflaugum í átt að borgunum Amritsar í Punjab-héraði og Jammu í Kasmír.

Óttast frekari stigmögnun

Ríki heims hafa hvatt bæði Indverja og Pakistana til þess að sýna stillingu, en bæði ríki búa yfir kjarnorkuvopnum.

Óvíst er um framhald átakanna, en greint var frá því í gær að indversk herskip með ofurhljóðfráum stýriflaugum hefðu siglt nær Pakistan á síðustu dögum og gætu þau m.a. reynt að ráðast á Karachi, stærstu hafnarborg Pakistans. Slík árás gæti haft gríðarleg áhrif á efnahag Pakistana, og myndi því kalla á viðbrögð frá Pakistan.