Norska ríkið stærsti hluthafinn í Norwegian

Norska ríkið verður stærsti hlut­haf­inn í þarlenda flug­fé­lag­inu Norweg­i­an með kaup­um sín­um á 6,4 pró­senta hlut í lággjalda­flug­fé­lag­inu sem hinn um­deildi Bjørn Kjos stjórnaði lengi vel sem for­stjóri og vakti mik­inn úlfaþyt er norska rík­is­út­varpið NRK fletti ofan af því að taí­lensk­ar áhafn­ir fengu greidd taí­lensk laun fyr­ir störf sín fyr­ir flug­fé­lagið í Evr­ópu.

For­saga þess­ara kaupa norska rík­is­ins er að flug­fé­lagið stóð höll­um fæti í heims­far­aldr­in­um og þáði neyðarlán frá rík­inu til að kom­ast gegn­um öldu­dal­inn. Var þar um sveigj­an­legt lán að ræða og um­samið að láns­upp­hæðina væri mögu­legt að gera upp sem hluta­bréf á föstu verði.

„Þetta er af­leiðing þess að í heims­far­aldr­in­um björguðum við Norweg­i­an þegar sam­fé­lagið kom til bjarg­ar,“ seg­ir Cecilie Myr­seth viðskiptaráðherra í sam­tali við norska rík­is­út­varpið NRK, en að mati Petter Nystrøm, grein­ing­araðila hluta­bréfa­markaðar­ins hjá ABG Sun­dal Collier, var lán norska rík­is­ins al­gjör­lega af­ger­andi fyr­ir flug­fé­lagið á þess­um tíma­punkti, þegar skór­inn kreppti hjá ferðaþjón­ustuaðilum um gerv­alla heims­byggðina vegna kór­ónu­veirunn­ar.

Ríkið grætt tölu­vert á lán­inu

Um það samd­ist milli rík­is­ins og lággjalda­flug­fé­lags­ins norska, sem barðist í bökk­um, að í stað þess að greiða láns­upp­hæðina til baka hlyti ríkið eign­ar­hlut í flug­fé­lag­inu og seg­ir viðskiptaráðherra aðspurð að norska ríkið hyggi ekki á flugrekst­ur, fyr­ir því hafi aðeins vakað að bjarga mik­il­væg­um vinnu­stöðum í far­aldr­in­um.

Ríkið hef­ur hins veg­ar grætt tölu­vert á lán­inu sem síðar varð að eign­ar­hluta, seg­ir Nystrøm grein­andi og bend­ir á að ríkið hafi hagn­ast um 250 millj­ón­ir króna, jafn­v­irði 3,1 millj­arðs ís­lenskra króna, við verðhækk­un hluta­bréf­anna er það fékk í sinn hlut fyr­ir lánið. Nú þurfi ríkið aðeins að ákveða hvort það ætli sér að vera framtíðar­eig­andi að Norweg­i­an eður ei.

Tel­ur hann lík­legt að ríkið muni fara sömu leið og aðrir hlut­haf­ar og von­ast eft­ir se mestri hækk­un bréfa fé­lags­ins er fram líða stund­ir.

Að sögn Hans-Jør­gen Wi­bstad fjár­mála­stjóra Norweg­i­an var það fé­lagið sjálft sem falaðist eft­ir þess­ari lausn. „Við erum mjög ánægð með þessi viðskipti, þau koma sér mjög vel fyr­ir Norweg­i­an. Eins hef­ur sam­starfið við ríkið glatt okk­ur um langt skeið,“ seg­ir Wi­bstad.

NRK

Dagens nær­ingsliv

Til­kynn­ing rík­is­stjórn­ar­inn­ar

• Blogga um frétt