Darcula horfinn með öllu

Innsti kopp­ur í búri einn­ar um­fangs­mestu svika­myllu sem farið hef­ur um lýðnetið, Magic Cat, en sá kall­ar sig Darcula í sta­f­ræna veru­leik­an­um, virðist vera horf­inn með öllu og ná jafn­vel sam­starfs­menn í hans innsta hring engu sam­bandi við hann.

Í hinum veru­leik­an­um, þeim sem ekki bygg­ist á sí­fellt full­komn­ari ör­gjörv­um, er Darcula 24 ára gam­all Kín­verji að nafni Yucheng C, þetta af­hjúpuðu rík­is­út­vörp Nor­egs og Þýska­lands, NRK og  Bayer­ischer Rund­funk, ásamt franska stór­blaðinu Le Monde í maí, en aðferðafræði Magic Cat og höf­unda þess bygg­ir á því að dreifa for­riti sínu gegn­um sam­skiptamiðil­inn Tel­egram og ginna net­verja um gerv­alla heims­byggðina til að smella á hlekki sem gera þeim skrá­veifu eina og miska.

NRK náði sam­bandi við Darcula

Var það norska rík­is­út­varpið NRK sem fletti ofan af Töfra­kett­in­um ill­ræmda sem að meg­in­stefnu til beindi fólki inn á ginn­ing­arsíður sem virt­ust fals­leysið eitt en eft­ir að korta­upp­lýs­ing­ar voru gefn­ar þar upp var svika­hröpp­un­um það leik­ur einn að ná öll­um fjár­mun­um út af viðkom­andi korti áður en kort­hafi fær rönd við reist.

Í kjöl­far þess að frétta­menn NRK höfðu sam­band við Darcula net­leiðis birt­ist til­kynn­ing í lokuðum not­enda­hópi á Tel­egram um að nú væri ekki leng­ur unnt að kaupa ný not­enda­leyfi fyr­ir svika­myll­una Magic Cat. Frá þessu grein­ir netör­ygg­is­sér­fræðing­ur­inn Harri­son Sand, sem starfar fyr­ir tæknifyr­ir­tækið Mnemonic, í sam­tali við NRK.

Spá­ir Sand því að nú sé þess ekki langt að bíða að Magic Cat verði ónot­hæft með öllu, for­rit sem nýst hef­ur höf­und­um sín­um og leyf­is­höf­um til að svíkja óheyri­leg­ar fjár­hæðir út úr net­not­end­um um ára­bil, meðal ann­ars í Nor­egi þar sem NRK hef­ur haft uppi á nokkr­um fórn­ar­lömb­um þótt upp­hæðirn­ar í þeirra til­fell­um séu ekki svim­andi miðað við aðra heims­hluta og fjöl­menn­ari lönd.

884.000 kort á sjö mánuðum

„Not­enda­leyfi fyr­ir Magic Cat eru vana­lega gef­in út fyr­ir viku eða mánuð í senn,“ út­skýr­ir Sand fyr­ir NRK, „án mögu­leika á kaup­um nýrra leyfa verður notk­un for­rits­ins úti­lokuð,“ en fyr­ir­tæki hans, Mnemonic, átti einna stærst­an þátt í því að af­hjúpa Magic Cat-svika­myll­una.

For­ritið leit dags­ins ljós árið 2023 og síðan hafa hundruð svindlara nýtt það í sína þágu til að verða sér úti um illa fengið fé. Sam­kvæmt þeim gögn­um sem NRK hef­ur viðað að sér komust óprúttn­ir aðilar yfir upp­lýs­ing­ar 884.000 greiðslu­korta um gerv­alla heims­byggðina á sjö mánaða tíma­bili og reynd­ust þar af 19.000 kort vera norsk.

Meðal þess sem fjöl­miðlarn­ir þrír beittu fyr­ir sig við rann­sókn sína var að hafa, und­ir fölsku flaggi, sam­band við fjölda Tel­egram-not­enda er tengd­ust Magic Cat og spyrja þá hvort þjón­usta þeirra væri til sölu.

„Stjór­inn er horf­inn“

Einn svar­enda var x66 sem frétta­menn NRK þekktu reynd­ar af öðrum vett­vangi þar sem þeir höfðu setið hjá hon­um svind­l­nám­skeið er þeir síðar greindu frá í frétt­um sín­um. Staðfesti x66, ásamt öðrum aðila sem NRK ræddi við, að Magic Cat hefði lagt þjón­ustu sína niður.

„Stjór­inn er horf­inn og eng­in leið að ná sam­bandi við hann,“ sagði x66 við NRK og átti þar við kín­verska höfuðpaur­inn Darcula, öðru nafni Yucheng C., sem óvíst er að nokkru sinni verði dreg­inn til ábyrgðar fyr­ir af­brot sín enda sem leit að nál­inni í hey­stakkn­um að finna nær nafn­laus­an og að mestu sta­f­ræn­an kín­versk­an tölvuþrjót úti á götu inn­an um sauðsvart­an pupu­l­inn.

NRK

NRK-II (um­fangs­mik­il af­hjúp­un miðlanna þriggja)

For­bes

Le Monde (á frönsku)

• Blogga um frétt