Selenskí til Tyrklands: Næstu skref óákveðin
Setja bókamerki
Volodimír Selenskí hefur lagt af stað til Tyrklands þar sem hann mun hitta Recep Tayyip Erdogan Tyrklandsforseta og ákveða næstu skref varðandi friðarviðræður við Rússa. Donald Trump Bandaríkjaforseti hefur ekki útilokað komu sína.
Trump tjáði fjölmiðlum í gær að hann gæti vel hugsað sér að fara til Tyrklands ef Vladimír Pútín Rússlandsforseti myndi leggja leið sína þangað. Hefur nú verið greint frá að Pútín muni ekki láta sjá sig í viðræðunum sem eiga að fara fram í Istanbúl.
Hefur verið greint frá því að í sendinefnd Rússa í Istanbúl verði lágtsettir diplómatar.
Ekki hissa á fjarveru Pútíns
„Ef eitthvað myndi gerast, þá færi ég á föstudaginn, ef það væri viðeigandi,“ sagði Trump við blaðamenn í Katar í morgun, en Bandaríkjaforsetinn er þar staddur í heimsókn.
Þá sagðist hann jafnframt ekki vera hissa á fjarveru Pútíns:
„Af hverju ætti hann að fara ef ég fer ekki?“
„Eins og að taka nammi frá barni“
Þrátt fyrir batnandi samskipti á milli Bandaríkjanna og Úkraínu talaði Trump enn einu sinni um úkraínska kollega sinn Selenskí, sem vann náið með fyrrverandi Bandaríkjaforseta, Joe Biden, að því að tryggja milljarða bandaríkjadala í hernaðaraðstoð fyrir Úkraínu.
„Ég held að hann sé kannski besti sölumaður sögunnar,“ sagði Trump um Selenskí og benti jafnframt á hvernig Trump-stjórnin hefði skorið niður aðstoð til landsins.
„Það var svo auðvelt, eins og að taka nammi frá barni.“
Næstu skref ákveðin í Tyrklandi
Að sögn háttsetts úkraínsks embættismanns hefur Selenskí nú lagt af stað til borgarinnar Ankara í Tyrklandi, þar sem hann mun hitta Erdogan Tyrklandsforseta.
Þar verða síðan ákveðin næstu skref í friðarviðræðunum við Rússland.
Hefur Selenskí áður sagt að ef Pútín myndi ekki mæta til viðræðna í Istanbúl sé það skýrt merki um að hann hafi ekki raunverulegan áhuga á friði.
Þetta eru fyrstu friðarviðræðurnar í meira en þrjú ár þar sem bæði Rússar og Úkraínumenn myndu koma beint að borðinu.
„Það er verið að gera rannsóknir pólitískar“
Þarf pening til að fjármagna mistökin
Leggur fram frumvarp til að tryggja 48 daga
Árásin heiftúðleg, vægðarlaus og tilefnislaus
Rafmagnslaust í Grindavík
Segir ráðherra vera kominn í ógöngur