Stefnir í að kröfu Trump verði mætt
Setja bókamerki
NATO-ríki virðast stefna að því að samþykkja málamiðlunartillögu á leiðtogafundi bandalagsins í næsta mánuði með það að markmiði að mæta kröfu Donalds Trump Bandaríkjaforseta um að bandalagsríki verji fimm prósentum af vergri landsframleiðslu í varnarmál.
Í tilraun til að geðjast Trump hefur Mark Rutte, framkvæmdastjóri NATO, lagt fram tillögu þess efnis að ríki bandalagsins skuldbindi sig til að verja 3,5 prósentum af vergri landsframleiðslu til beinna hernaðarútgjalda fyrir árið 2032, og 1,5 prósentum til viðbótar í útgjöld tengd öryggismálum.
Þetta myndi gera Trump kleift að halda því fram að kröfu hans um 5% útgjöld bandalagsríkja til varnarmála hafi verið mætt á sama tíma og evrópsk ríki NATO, sem þegar eiga í erfiðleikum með að mæta núverandi útgjaldaviðmiði sem er tvö prósent af vergri landsframleiðslu, myndu fá nægilegt svigrúm.
„Við fylgjum honum þar“
Johann Wadephul, utanríkisráðherra Þýskalands, talaði með opinskáum hætti um þessa tillögu á fundi með starfsbræðrum sínum í NATO í Tyrklandi í dag og sagði að þýsk yfirvöld væru tilbúin að samþykkja hana.
Sagði hann að með þessu móti yrði kröfu Trump um nauðsynlega hækkun útgjaldaviðmiðsins mætt.
„Og við fylgjum honum þar,“ sagði ráðherrann.
Rétt hlutfall fyrir kjarnavarnarútgjöld
Þá gaf Jean-Noel Barrot, utanríkisráðherra Frakklands, sem er annað evrópskt lykilríki í NATO, sömuleiðis grænt ljós á tillöguna.
„Markmiðið um 3,5 prósent er rétt hlutfall fyrir kjarnavarnarútgjöld,“ sagði Barrot við blaðamenn í Tyrklandi í dag.
Stuðningur Þýskalands og Frakklands mun gera öðrum evrópskum NATO-ríkjum og Kanada erfiðara fyrir að hafna útgjaldasamningnum á leiðtogafundi NATO í júní. Áætlunin nýtur þegar stuðnings Bandaríkjanna.
Austur-Evrópuríki til í að gefa enn frekar í
Í samtali við blaðamenn í dag sagðist Rutte „nokkuð viss“ um að samkomulag um áætlunina myndi nást þar sem ríki NATO séu almennt sammála um að þau þurfi að gefa í hernaðarútgjöld vegna þess mats að rússnesk yfirvöld þurfi aðeins þrjú til fimm ár til að endurbyggja her sinn þegar átökum í Úkraínu lýkur.
Framkvæmdastjórinn neitaði að gefa frekari upplýsingar um stöðu viðræðnanna þar sem enn eru sex vikur í leiðtogafundinn.
Evrópsk bandalagsríki NATO hafa aukið varnarútgjöld sín síðan Rússland réðst inn í Úkraínu árið 2022 en ekkert af ríkjunum 32 sem eru aðilar að bandalaginu, þar með talið Bandaríkin, verja nú fimm prósentum af vergri landsframleiðslu til varnarmála.
Austur-Evrópuríkin sem stafar hvað mest ógn af Rússlandi, eins og Eystrasaltsríkin og Pólland, hafa þegar lýst sig reiðubúin til að fara fram úr fimm prósenta markinu í beinum hernaðarútgjöldum.
„Óafturkræfar“ skemmdir á fornleifum í Laugarnesi
Maðurinn sem féll í Brúará fundinn
Voru morðin ekki framin?
Árás á ungar stúlkur í veikri stöðu
Hálaunastörf í forgrunni
Kristrún segir Víði eiga frumkvæðið
Samningarnir komnir í uppnám
Umræða um kostnað við fatlað fólk niðurlægjandi