Erlent | AFP | 23.5.2025 | 16:59

Dómari tálmar atlögu Trumps að Harvard

Harvardháskóli hefur stefnt Trump-stjórninni. AFP

Dómari í Boston hefur hindrað Trump-stjórnina frá því að banna Harvard-háskóla að innrita erlenda nema.

Harvardháskóli, elsti háskóli Bandaríkjanna, hefur stefnt ríkisstjórn Donalds Trumps Bandaríkjaforseta í dag eftir að bandaríska heimavarnarráðuneytið afturkallaði í gær heimild háskólans til að innrita erlenda nema.

Allison D. Burroughs, dómari í Boston, hefur nú sett stólinn fyrir dyrnar og lagt á bráðabirgðalögbann gegn tilskipun heimavarnaráðuneytisins, að því er New York Times greinir frá.

Frétt af mbl.is

Harvard í mál við ríkisstjórn Trump

Kristi Noem, heimavarnarráðherra Bandaríkjanna, ritaði háskólanum bréf í gærkvöldi þar sem segir að Harvard hafi ekki lengur heimild til að innrita erlenda nema. Í bréfinu kemur fram að ákvörðunin taki gildi strax. Það væri ekki réttur háskóla, heldur forréttindi, að innrita erlenda nemendur.

Í stefnu skólans segir að með ákvörðun sinni sé ríkisstjórnin að virða að vettugi stjórnarskrárbundinn rétt skólans til skoðanafrelsis. Dómarinn segist í úrskurði sínum vera sammála Harvard um að bannið gæti valdið skólanum „beinu og óbætanlegu tjóni“.

Námsferli Íslendinga stefnt í óvissu

Ákvörðunin heimavarnaráðuneytisins gildir ekki aðeins um þá nemendur sem koma til með að innrita sig í skólann heldur gildir hún afturvirkt um þá sem þegar hafa hafið skólavist í skólanum. Erlendir nemar við skólann þurfa því að finna sér nýjan skóla að öllu óbreyttu.

Fjöldi Íslendinga stundar nám við skólann og er framtíð þeirra við skólann hefur nú verið stefnt í óvissu.

„Við fordæmum þessa ólöglegu og ósanngjörnu ákvörðun sem teflir framtíð þúsunda nemenda í tvísýnu. Þetta er áhyggjuefni fyrir alla þá nemendur sem ákveðið hafa að koma til Bandaríkjanna til þess að stunda nám sitt,“ sagði Alan Garber, rektor Harvard, í yfirlýsingu.