Trump herðir herferðina gegn Harvard og Columbia
Setja bókamerki
Donald Trump, forseti Bandaríkjanna, efldi herferð sína gegn helstu háskólum Bandaríkjanna í gær með því að meina erlendum nemendum að fá vegabréfsáritun sem ætla að stunda nám við Harvard og hótar að svipta Columbia-háskóla faggildingu sinni.
Trump fullyrðir að erlendir nemendur þeirra ógni þjóðaröryggi og að þeir hafi m.a. hunsað gyðingahatur á háskólasvæðum.
Í tilkynningu sem Hvíta húsið gaf út í gær var sagt að koma erlendra nemenda til að hefja nám við Harvard yrði „stöðvuð og takmörkuð“ í sex mánuði og að hægt væri að afturkalla vegabréfsáritanir núverandi erlendra nemenda.
„Framferði Harvard-háskóla hefur gert hann að óhentugum áfangastað fyrir erlenda nemendur og rannsakendur,“ sagði í tilkynningunni.
„Ég skelf. Þetta er hneyksli,“ sagði austurrískur nemandi í stjórnmálafræði og klassískum fræðum við Harvard. „Hann er að misnota framkvæmdavald sitt til að skaða Harvard eins mikið og hann getur.“
„Guð minn góður!“ sagði annar erlendur nemandi við Harvard, sem vildi ekki láta nafns síns getið af ótta við hefndaraðgerðir, þegar hann frétti af úrskurðinum. „Þetta er slík skömm.“
Hefndaraðgerðir
Tilkynningin kom eftir að fyrri tilraunir stjórnar Trumps til að binda enda á rétt Harvard til að skrá erlenda nemendur voru stöðvaðar af dómara.
Stjórnvöld hafa þegar skorið niður um 3,2 milljarða dollara af ríkisstyrkjum og samningum sem komu Harvard til góða og lofuðu að útiloka stofnunina frá öllum framtíðarfjárveitingum.
Harvard hefur verið þyrnir í augum Trumps eftir að skólinn neitaði að verða við kröfum hans um eftirlit með námskrá sinni, ráðningum starfsfólks, nýliðun nemenda og „fjölbreytni sjónarmiða“.
Trump hefur einnig einblínt á erlenda nemendur við Harvard, sem á skólaárinu 2024-2025 voru 27% af heildarfjölda nemenda og mikilvæg tekjulind skólans.
„Þetta er enn eitt ólöglega hefndarskrefið sem stjórnin tekur í bága við réttindi Harvard samkvæmt fyrstu grein stjórnarskrárinnar,“ sagði talsmaður háskólans. „Harvard mun halda áfram að vernda erlenda nemendur sína.“
Nýjasta aðgerðin gegn Harvard kemur á sama tíma og menntamálaráðherra Trumps hótaði í gær að svipta Columbia-háskóla faggildingu sinni.
Ólíkt Harvard hafa nokkrar stofnanir, þar á meðal Columbia, þegar látið undan víðtækum kröfum stjórnar Trumps, sem heldur því fram að menntaelítan sé of vinstrisinnuð.
Barátta gegn gyðingahatri
„Columbia-háskóli leit undan þegar nemendur af gyðingatrú urðu fyrir áreitni,“ sagði Linda McMahon, menntamálaráðherra Bandaríkjanna, á samfélagsmiðlinum X.
Hún sakaði skólann um að brjóta reglur sem banna viðtakendum alríkisfjármagns að mismuna á grundvelli kynþáttar, litarháttar eða þjóðernis.
„Eftir hryðjuverkaárás Hamas á Ísrael, þann 7. október 2023, brást forysta Columbia háskóla við með skeytingarleysi gagnvart áreitni á nemendur af gyðingatrú á háskólasvæðinu,“ sagði McMahon í yfirlýsingu sinni. „Þetta er ekki aðeins siðlaust, heldur einnig ólöglegt.“
Í yfirlýsingunni sagði menntamálaráðuneyti Bandaríkjanna að skrifstofa þess fyrir borgaraleg réttindi hefði haft samband við faggildingaraðila í Columbia vegna meints brots.
Ef Columbia yrði svipt faggildingu sinni myndi það þýða að háskólinn missti aðgang að öllu alríkisfjármagni sem er mjög stór hluti af tekjum háskólans.
Nemendur sem stunda nám við háskólann myndu heldur ekki geta fengið styrki eða lán til að greiða skólagjöld.
Gagnrýnendur saka stjórn Trumps um að nota ásakanir um gyðingahatur til að ráðast á menntaelítuna og koma háskólum á kné.
Stjórnvöld hafa þegar sett 400 milljónir dollara af fjármagni Columbia í endurskoðun, sem leiddi til þess að háskólinn tilkynnti í mars um röð ívilnana til stjórnvalda varðandi skilgreiningu á gyðingahatri og eftirlit með t.a.m. mótmælum.
Hafa orðið vör við áhyggjur
Í kjölfar tilkynningarinnar í gær sagði talsmaður Columbia að háskólinn væri „meðvitaður um áhyggjurnar“ sem stjórnvöld hefðu vakið.
„Við höfum tekið á þessum áhyggjum,“ sagði talsmaðurinn og bætti við að „Columbia er staðráðin í að berjast gegn gyðingahatri á háskólasvæði okkar.“
„Við tökum þetta mál alvarlega og höldum áfram að vinna með alríkisstjórninni að því að leysa það,“ sagði talsmaðurinn. „Við tökum þetta mál alvarlega og höldum áfram að vinna með alríkisstjórninni að því að leysa það,“ sagði hann jafnframt að lokum.
Ráðuneytið fékk viðvörun: „Þetta er hreinasti óþarfi“
/frimg/1/57/57/1575793.jpg)
Rússar eiga ekki möguleika ef NATO stendur saman
Steinþór sýknaður í Hæstarétti
Sló í brýnu í þingsal
Missti stjórn á bílnum í glerhálku
Tvöföld þjóðaratkvæðagreiðsla um ESB
Bandaríkin ætli sér stærri hluti en reiknað var með