Fólk stökk út úr byggingum til að bjarga sér

Sjón­ar­vott­ur sem varð vitni að Boeing 787 Dreaml­iner-flug­vél á veg­um Air India, á leið frá Ah­meda­bad til Gatwick-flug­vall­ar í Lund­ún­um, hrapa skömmu eft­ir flug­tak, seg­ir hrap flug­vél­ar­inn­ar hafa valdið tölu­verðu tjóni á svæðinu. 

Frétt af mbl.is

Ótt­ast að fjöldi manns hafi far­ist í flug­slysi

242 manns voru um borð í vél­inni. Air India hef­ur staðfest að 169 þeirra voru ind­versk­ir rík­is­borg­ar­ar, 53 bresk­ir, sjö portú­galsk­ir og einn kanadísk­ur. Þjóðerni þeirra 12 sem voru í áhöfn flug­vél­ar­inn­ar hef­ur ekki verið til­kynnt.

Lög­reglu­yf­ir­völd í Ah­meda­bad hafa staðfest að vél­in hafi hrapað rétt utan svæðis flug­vall­ar­ins í Ah­meda­bad inn í miðju íbúa­hverfi.

Frétt af mbl.is

For­sæt­is­ráðherr­ar tjá sig um flug­slysið

„Þegar við kom­um að staðnum þar sem slysið varð voru brennd lík úti um allt. Við hjálpuðum svo þeim sem voru fast­ir í hús­um á svæðinu að kom­ast út. Fólk var að hoppa út úr bygg­ing­um frá þriðju hæð til að bjarga lífi sínu,“ seg­ir íbúi á svæðinu sem varð vitni að slys­inu.

Boeing hef­ur gefið út yf­ir­lýs­ingu vegna slyss­ins þar sem seg­ir að til­drög slyss­ins séu til rann­sókn­ar en Boeing 787 Dreaml­iner-flug­vél hef­ur aldrei áður hrapað.

242 voru um borð í vél­inni. AFP

• Blogga um frétt