Nýja-Sjáland besti staðurinn til að fá herpes

Góðgerðar­stofn­un­in Herpes Foundati­on á Nýja-Sjálandi segja lausn­ina við að efla þjóðarstolt Ný­sjá­lend­inga vera herpes.

Þetta var boðskap­ur stofn­un­ar­inn­ar í októ­ber á síðasta ári þegar hún hóf þá her­ferð að gera landið að besta staðnum til að smit­ast.

Farið var af stað í her­ferðina, sem miðaði að því að herpes yrði ekki leng­ur eitt­hvað til að skamm­ast sín fyr­ir, með bráðfyndnu aug­lýs­ing­ar­mynd­bandi. Það hlaut verðlaun í Grand Prix for Good-flokkn­um á alþjóðlegu verðlauna­hátíðinni Cann­es Li­ons í ár. Sá flokk­ur miðar að því að varpa ljósi á starf sjálf­seign­ar- og góðgerðar­stofn­ana, að því er kem­ur fram í um­fjöll­un BBC.

Sir Gra­ham Henry, fyrr­ver­andi þjálf­ari ný­sjá­lenska landsliðsins í ruðningi, lék í aug­lýs­ing­unni sem átti að virka sem land­kynn­ing fyr­ir ferðamenn. Í mynd­band­inu lofaði hann vel­gengni Nýja-Sjá­lands og harmaði dvín­andi upp­sprettu þjóðarstolts og nefndi í því sam­hengi „vand­ræðal­ega lágt“ hlut­fall milli sauðfjár og manna á Nýja-Sjálandi.

„Það er kom­inn tími til að Nýja-Sjá­land verði besti staður­inn í heim­in­um til að fá herpes,“ seg­ir hann í aug­lýs­ing­unni, sem hef­ur notið gríðarlegra vin­sælda.

• Blogga um frétt