Þingfundi lauk á Alþingi klukkan sjö mínútur yfir miðnætti í nótt en greidd voru atkvæði um fjárlagafrumvarpið eftir aðra umræðu. Þingfundur hefst að nýju klukkan 10. 

Fjárlaganefnd kemur saman til fundar klukkan 8:45 og allsherjar- og menntamálanefnd fundar klukkan 9 og verða málefni útlendinga meðal efnis á fundinum.

Í Morgunblaðinu í dag kemur fram að annarri umræðu um fjárlagafrumvarp fjármálaráðherra fyrir árið 2016 lauk kl. 15:41 í gær og hafði fyrsta og önnur umræða þá staðið í samtals 92 klukkustundir. Fyrsta umræða stóð í 16 klukkustundir og 11 mínútur og önnur umræða í 75 klukkustundir og 50 mínútur.

Við fyrstu umræðu var fjöldi ræðumanna 42 þingmenn og við aðra umræðu var fjöldi ræðumanna 51. Samtals var ræðufjöldi í fyrstu og annarri umræðu 1.752 ræður.

Til samanburðar þá tók fjárlagaumræðan, allar þrjár umferðirnar og atkvæðagreiðsla, árið 2012 fyrir árið 2013 alls um 80 klukkustundir.