Fagna flugi en vilja hætta með strætó
Setja bókamerki
Eyþing, samband sveitarfélaga í Eyjafirði og Þingeyjarsýslum, telur ekki grundvöll fyrir áframhaldandi rekstri almannasamgangna, nema til komi stóraukið framlag frá ríkinu til rekstrarins. Var ákveðið á aðalfundi sveitarfélaganna að fela stjórn Eyþings að nýta uppsagnarákvæði samningsins.
Fram komnum hugmyndum um um niðurgreiðslu á innanlandsflugi var hins vegar fagnað á fundinum og var skorað á stjórnvöld að fylgja því máli eftir.
Í ályktun fundarins kom þá fram að mikilvægt væri að tryggja fjármagn til áframhaldandi uppbyggingar samgöngumannvirkja í landshlutanum. Þá lögðu fundarmenn sérstaka áherslu á að tryggt yrði fjármagn til að klára Dettifossveg og til uppbyggingar á flughlaði á Akureyrarflugvelli.
„Auk þessa ítrekar fundurinn áður framkomnar ályktanir Eyþings um mikilvægi þess að koma uppbyggingu vegar um Langanesströnd og Brekknaheiði með bundnu slitlagi inn á framkvæmdaáætlun.“
Ástand í orkumálum á Norðurlandi eystra er hins vegar sagt vera algjörlega óviðunandi. „Ráðast þarf í stórátak í endurnýjun og styrkingu dreifikerfis raforku landsins til að bæta samkeppnisstöðu atvinnulífs í landshlutanum. Mikilvægt er að stjórnvöld skýri reglur og markmið og stuðli að betri sátt um uppbyggingu dreifikerfis raforku,“ segir í ályktuninni.
Þá skoruðu fundarmenn á stjórnvöld að stuðla að læknanámi við Háskólann á Akureyri og auka fjárveitingar til iðn- og tæknináms á framhalds- og háskólastigi á svæðinu. Einnig sé brýnt að hefja byggingu legudeilda við Sjúkrahúsið á Akureyri, tryggja fjármagn til reksturs hjúkrunarheimila og að daggjöld séu miðuð við þær kröfur sem gerðar eru til rekstrarins.
Sóknaráætlanir voru enn fremur sagðar hafa sannað sig sem öflugt verkfæri í byggðamálum og mikilvægt væri að stjórnvöld hvikuðu ekki frá því verklagi sem í þeim fælist.
Alvarleg líkamsárás og snákur gerður upptækur
Stefán ekki reynt að fegra hlut sinn
Hófu undirbúning atkvæðagreiðslu um verkfall
Hafa fengið nokkrar ábendingar
Svart af síld út af Norðurlandi
HK fær nýjan heimavöll utandyra
Átta enn saknað eftir árásina á Kænugarð
Ójafnræði og forræðishyggja