Bergþóra Þorkelsdóttir forstjóri Vegagerðarinnar sat fyrir svörum um samgöngumál höfuðborgarsvæðisins í nýjasta þætti Spursmála. Þátturinn var sýndur í beinu streymi hér á mbl.is kl. 14 í dag.
Upptöku af þættinum má nálgast í spilaranum hér að ofan og er hún aðgengileg öllum.
Samgöngumál um allt land voru rædd af kappi en framkvæmdaráætlun Fossvogsbrúar var í forgrunni þar sem knúið var á um svör við krefjandi spurningum um umfram kostnaðaráætlun og tillögu að hönnun brúarinnar.
Fyrirhuguð brú yfir Fossvog jafnt og önnur samgöngumannvirki sem til stendur að reisa á höfuðborgarsvæðinu í náinni framtíð hafa verið mikið í umræðunni undanfarið og hlotið mikla gagnrýni.
Forstjóra Vegagerðarinnar var gert að svara fyrir gagnrýnina í samræmi við hlutverk og skuldbindingu Samgöngusáttmála höfuðborgarsvæðisins.
Núverandi áætlun við landmótun og yfirborðsfrágang á Fossvogsbrú nemur töluvert hærri kostnaði en kynntur var í upphafi. Þá hefur hönnunartillagan Alda, sem bar sigur úr býtum í hönnunarsamkeppni á vegum Vegagerðarinnar, Reykjavíkurborgar og Kópavogsbæjar, vakið upp ýmsar spurningar varðandi forgangsröðun og kostnað við framkvæmdirnar.
Yfirferð á helstu fréttum vikunnar var einnig á sínum stað. Þau Bragi Valdimar Skúlason, orðasnillingur, dagskrárgerðarmaður og textasmiður með meiru mætti í settið ásamt þingkonunni Ingu Sæland til að fara yfir þær fréttir sem voru í eldlínunni í líðandi viku.
Þar kom margt áhugavert upp úr dúrnum.
Fylgstu með upplýsandi og spennandi samfélagsumræðu í Spursmálum hér á mbl.is alla föstudaga kl. 14.