Innlent | Morgunblaðið | 13.5.2024 | 20:30

Æðruleysi og einn dagur tekinn í einu

Erna Rún heima í Stefnisvogi, hér með börnunum sínum, þeim Hjörtfríði og Árna Jakobi. Fjölskyldan flytur í Kópavoginn í júnímánuði. mbl.is/Eyþór

Stór hópur Grindvíkinga á samastað sinn í tilverunni í Vogabyggð í Reykjavík. Í stórum klasa nýrra fjölbýlishúsa við Stefnisvog eru alls 75 íbúðir og telst kunnugum svo til að um 50 þeirra séu í útleigu til fólks úr Grindavík.

„Hér hefur myndast samfélag fólks sem þekkist fyrir og því fylgir góð tilfinning. Þó er fólk hvað í sínu og samgangur ekki endilega mikill,“ segir Erna Rún Magnúsdóttir sem býr með fjölskyldu sinni í íbúð í Stefnisvogi 14.

Frétt af mbl.is

Þrír bræður verða í sömu blokkinni

Þau Erna Rún, Óðinn Árnason eiginmaður hennar og börnin þeirra tvö; þau Hjörtfríður og Árni Jakob, fóru úr Grindavík þegar bærinn var rýmdur 10. nóvember sl. haust. Fengu fyrst þar á eftir íbúð í miðbæ Reykjavíkur en færðu sig í Vogabyggðina í byrjun desember. Eru þar í leiguíbúð í eigu fasteignafélagsins Klasa sem þau hafa fram í júlí næstkomandi.

„Við fengum húsið okkar við Fornuvör greitt út á dögunum. Vorum svo á dögunum að festa okkur íbúð í Kópavogi og að minnsta kosti millilendum þar. Horfum þó auðvitað til þess að komast aftur til Grindavíkur í framtíðinni, en tökum bara einn dag í einu,“ segir Erna Rún sem í Grindavík starfrækti líkamsræktarstöðina Portið. Einnig var hún þjálfari kvenna í yngri flokkunum í körfubolta.

Allar tilfinningar

„Starfsemi Portsins liggur niðri og körfuboltastelpurnar eru komnar í önnur lið. Þetta verður bara að hafa sinn gang,“ segir Erna og bætir við að aðalstarf sitt sé að skutla börnunum í og úr skóla, íþróttir og annað. Dóttirin er í Fjölbrautaskóla Suðurnesja í Reykjanesbæ og sonurinn í grunnskóladeild fyrir Grindavíkurbörn sem starfrækt er við Ármúla í Reykjavík. Óðinn starfar hjá Festi hf. í Kópavogi.

„Ástand síðustu mánaða hefur sannarlega tekið á og líðan fólks spannar allan tilfinningaskalann. Því er auðvitað best að taka þetta af æðruleysi og vona hið besta,“ segir Erna Rún Magnúsdóttir.