Atvinnurekandi í Grindavík segir stöðuna erfiða fyrir atvinnurekendur í bæjarfélaginu. Koma verði til móts við atvinnurekendur sem berjast í bökkum.

„Við erum reyndar svo heppin að við erum á öruggu svæði hér og erum að þjónusta fiskvinnslurnar mikið þannig við náum aðeins að halda opnu,“ segir Ómar Davíð Ólafsson, verslunareigandi í Grindavík.

Blaðamaður mbl.is gerði sér ferð til Grindavíkur og ræddi við atvinnurekendur á svæðinu.

Þyrfti að opna bæinn

Ómar segir fyrirtæki sem starfa við ferðaþjónustu í Grindavík kalla eftir aðgerðum en þau hafa öll verið meira og minna lokuð.

„Fljótlegasta leiðin til að koma líflínu og súrefni til þeirra væri að opna inn í bæinn. Þá myndu þau hætta að kvarta,“ segir Ómar en bætir við: „Maður skilur það alveg, þau geta ekki haft opið.“

Gera bæinn öruggan

Telur Ómar að nýta ætti góða veðrið til að gera við innviði í bænum.

„Núna myndum við vilja hefja framkvæmdir í bænum, nýta góða veðrið og loka sprungum, gera bæinn öruggan og opna hann.“

Að mati Ómars ætti bærinn að vera opinn þegar engin hætta er yfirvofandi. Þegar viðvörunarbjöllur hljóma ætti aftur á móti að loka honum.

Reyna að halda þessu gangandi

Ef bærinn myndi opna hversu mikil yrði aðsóknin?

„Það eina sem ég hef áhyggjur af er að það yrði rosaleg aðsókn í bæinn, að það myndu allir koma til Grindavíkur,“ svarar Ómar.

Það kosti formúu að manna lokunarpóstinn. Í staðinn ætti að verja þeim fjármunum í gæslu í bænum og efla myndavélaeftirli.

Þið haldið þessu gangandi hér áfram?

„Við reynum.“

Tengdar fréttir

Eldvirkni á Reykjanesskaga

Landris á sama hraða og fyrir síðasta gos

• Heildarkostnaður varnargarða um 7 milljarðar
• Árangurinn „framar öllum vonum“
• „Gott að gosinu lauk á þessum tímapunkti“
• Kvikusöfnunin eykst líklega

» Fleiri tengdar fréttir

Raddir Grindvíkinga

Börnin upplifa sáran söknuð

• Óvenjumargir í Grindavík um helgina
• Íþróttahúsið Hópið rifið – „Mikil eftirsjá“
• Öllu starfsfólki sagt upp
• „Erfitt að horfa upp á endurtekna atburði“

» Fleiri tengdar fréttir

• Blogga um frétt