Norðurálsmótið á Akranesi var formlega sett í dag og mun standa fram til sunnudags. Mikil röskun hefur verið á umferð um svæðið þar sem Hvalfjarðargöngunum hefur þrisvar verið lokað í dag en ekki er búist við að það trufli mótið.
Eggert Herbertsson, formaður knattspyrnudeildar ÍA, segir í samtali við mbl.is að útlit sé fyrir að helgin verði góð.
„Mótið er hafið, en ég veit ekki til þess að slysið í Hvalfjarðargöngunum hafi haft nein áhrif á það. Flest lið voru komin hingað áður en göngin lokuðu og ég á því von á að allt gangi eins og það eigi að gera.“ segir Eggert.
„Það getur hinsvegar verið að einhverjir foreldrar, ömmur og afar hafi misst af þessu í dag en við vonum að það rætist úr þessu sem fyrst.“
Eggert segist búast við liðum alls staðar að af landinu, en mótið er fyrir yngri flokka og á hann því von á að fjöldi foreldra og annarra áhorfenda fylgi keppendunum.
„Við eigum von á hátt í tvö þúsund keppendum víðs vegar að af landinu, en við skjótum á að í heildina muni um 7.500 til 10.000 manns muni heimsækja bæinn á meðan mótinu stendur, sem er tvöföldun á íbúafjölda bæjarins,“ segir Eggert og bætir við:
„Svo er frábær stemmning í bænum, veðrið á að vera ágætt núna fyrst um sinn og við eigum ekki von á öðru en að þetta verði mjög gott mót.“