Starfsmenn eru heilir á húfi eftir að eldsvoði kom upp í atvinnuhúsnæði endurvinnslufyrirtækisins Pure North í Hveragerði í gær. Eldsupptökin voru í endurvinnsluvél, að sögn framkvæmdastjóra fyrirtækisins.
Einn var fluttur á Landspítalann þungt haldinn vegna reykeitrunar og annar var fluttur til aðhlynningar á Heilbrigðisstofnun Suðurlands eftir að eldur kviknaði um kl. 22.30 í gærkvöldi.
„Það eru allir útskrifaðir,“ segir Sigurður Grétar Halldórsson, framkvæmdastjóri Pure North, í samtali við mbl.is. Hann tekur fram að starfsmenn séu heilir á húfi.
Verksmiðjan var ekki í gangi þegar eldurinn kom upp en ræstingarstarfsfólk var aftur á móti við vinnu. Þrír voru á vakt.
„Þetta var sem sagt í einni vél sem eldurinn kom upp, sem var verið að sinna viðhaldi við,“ segir Sigurður. „En það er ekki alveg komið í ljós hvað gerðist.“
Lögreglan segir við mbl.is að tæknideildin fari á vettvang í dag. Sigurður segir að starfsmenn fyrirtækisins hafi enn ekki fengið tækifæri til þess að fara inn í húsið en samkvæmt upplýsingum frá lögreglu sé tjónið ekki allmikið.
„Meiri reykur heldur en eldur,“ hefur Sigurður eftir lögreglunni.