Síðustu umræður eru nú hafnar á Alþingi og ráðgert er að þingi ljúki í kvöld.
„Það er kominn mikill almennur og einhuga vilji hér í húsi um að ná að klára þetta þannig að fólk er almennt knappara í máli sínu en oft er í þessu ágæta húsi,“ segir Hildur Sverrisdóttir, þingflokksformaður Sjálfstæðisflokksins.
Hildur kveðst eiga von á að umræðurnar gangi hratt fyrir sig en að þeim loknum fara fram lokaatkvæðagreiðslur.
„Ég hef trú á því að við klárum hér fyrir miðnætti.“
Spurð um gang mála í dag svarar Hildur því til að búið sé að fara í gegnum ótrúlegan fjölda mála.
„Eins og oft er við þinglok þá eru dagar eða vikur sem fara í samningaviðræður en svo þegar það er komin lending í það, á milli allra flokkanna á Alþingi, þá ganga hlutirnir hratt fyrir sig. Við erum í þeim fasa núna og hefur bara gengið mjög vel.“