Löng röð byrjaði að myndast í Hjartagarðinum upp úr hádegi í dag við verslun 66°Norður. Um fimmleytið biðu hátt í hundrað manns í röðinni sem náði upp á Laugaveg.
Ástæða þess að fólk lagði á sig að bíða er ný samstarfslína 66°Norður og Reykjavik Roses sem var kynnt í verslun 66°Norður á Laugavegi 17 klukkan 18:00 í dag.
Í tilkynningu segir að 66°Norður og Reykjavík Roses hafi farið nýjar leiðir í markaðssetningu á nýju línunni þegar verslun 66°Norður á Laugavegi 17 var gröffuð af Reykjavík Roses undir þeim ályktunum að framið hefði verið skemmdarverk.
Það kom svo í ljós að uppátækið væri sviðsett þegar að fyrirtækin tilkynntu samstarf þann 28. júní.