Starfsmanni N1 á Blönduósi hefur verið sagt upp eftir að hann réðst á annan karlmann á bensínstöðinni á vinnutíma á sunnudag. Um er að ræða tvo kunningja en málið er komið á borð lögreglu.
Þetta staðfestir Jón Viðar Stefánsson, forstöðumaður einstaklingssviðs N1, í samtali við mbl.is.
„Þeir þekkjast. Þetta er svona persónulegur harmleikur á milli mannanna,“ segir Jón.
Lögregla gerði fyrirtækinu grein fyrir atvikinu seint í gær og í dag var farið yfir myndefni úr öryggismyndavélum N1.
„Þegar við sjáum gögnin í dag bregðumst við strax við og látum starfsmanninn fara,“ segir Jón.
Hann segir að starfsmaðurinn hafi kýlt manninn.
Samkvæmt heimildum mbl.is þá fór maðurinn á sjúkrahúsið á Akureyri af sjálfsdáðum eftir árásina og er búið að leggja fram kæru til lögreglu vegna málsins.