Keypti 175 skothelda hjálma á 34 milljónir
Setja bókamerki
Ríkislögreglustjóri keypti 175 skothelda hjálma fyrir leiðtogafund Evrópuráðsins sem haldinn var í Hörpu á síðasta ári.
Kostnaður við hjálmana og búnað þeim tengdum nam 195.475 pundum, eða um 34 milljónum króna ef miðað er við gengið í janúar 2023.
Þetta kemur fram í sölureikningum sem ríkislögreglustjóri hefur veitt mbl.is aðgang að eftir að hafa upphaflega hafnað því að birta gögnin.
Úrskurðarnefnd upplýsingamála skar úr um málið og var ríkislögreglustjóra gert að birta umbeðin gögn.
Hjálmar sem FBI notar
Hjálmarnir voru keyptir af breska fyrirtækinu TST Protection.
Ríkislögreglustjóri keypti 55 stykki af Busch AMP-1 TP hjálmum þann 12. janúar 2023 ásamt aukabúnaði á borð við andlitshlífar og poka. Kostaði það 107.635 pund, eða 18.696.200 krónur.
Þessi tegund er til dæmis notuð af alríkislögreglunni í Bandaríkjunum (FBI).
Ríkislögreglustjóri pantaði svo fleiri hjálma af TST þann 31. janúar. Þá voru pantaðir 120 hjálmar af gerðinni Busch AMP-1 E ásamt aukabúnaði tengdum hjálmunum. Kostaði það 87.840 pund, eða 15.268.349 krónur.
Eiga hjálmarnir að vera skotheldir gegn 9 mm byssukúlum og 44 Magnum.
Hjálmar og föt kostuðu rúmlega 46 milljónir
Inn á vefsíðu TST má sjá myndskeið og auglýsingar um hjálmana og hvernig þeir geta nýst lögreglu og sérsveit á vettvangi. Þá er sýnt hvernig fyrrnefndar tegundir verjast gegn byssukúlum.
mbl.is greindi einnig frá kaupum ríkislögreglustjóra á fatnaði sem nam 12.366.643 krónum. Þar á meðal voru keypt 146 smellubindi sem kostuðu um 313 þúsund krónur.
Kostnaður við kaup á hjálmum, búnaði þeim tengdum, og fatnaði nam alls 46.331.192 krónur.
/frimg/1/52/68/1526898.jpg)
„Fólk elskar þennan mann“
Börnum mismunað: Kjaradeilan verði leyst án tafar
Þungbært að missa félaga
Nágranninn fannst látinn við nærliggjandi skóla
Hvenær vitum við úrslitin?
Altjón eftir að kviknaði í út frá rafmagni