„Stórkostlegt að fá Ant­on Svein“

„Það er stórkostlegt að fá Ant­on Svein McKee til þess að leiða þetta,“ segir Sigmundur Davíð Gunnlaugsson, formaður Miðflokksins, um nýstofnaða ungliðahreyfingu Miðflokks­ins í Suðvest­ur­kjör­dæmi.

Sundmaðurinn og Ólymp­íufarinn Ant­on Sveinn leiðir hreyfinguna, en hún var stofnuð í gær. Félagið heitir Freyfaxi og er fyrsta ungliðafélagið í Miðflokknum.

Frétt af mbl.is

Anton Sveinn til liðs við Miðflokkinn

„Mér finnst líklegt að fleiri muni fylgja á eftir. Þarna kom saman gríðarlega öflugur hópur ungs fólks sem setti heilmikinn kraft í þetta og dreif bara í þessu. Það er búið að vera frábært að fylgjast með þeim og sjá þetta gerast,“ segir Sigmundur Davíð í samtali við mbl.is.

Anton Sveinn var kjörinn formaður í gær. Ljósmynd/Aðsend

Hafa heyrt í ungu fólki um allt land

Þá segir Sigmundur Miðflokkinn hafa rætt við margt ungt fólk um allt land til að taka þátt í uppbyggingu ungliðahreyfinga í fleiri kjördæmum. Hann segir það vera mikinn styrk fyrir flokkinn að hafa ungt fólk með sér í liði. 

„Það er gríðarlegur styrkur í því fólginn fyrir okkur, sérstaklega núna þegar ýmis málefni ungs fólks eru í brennidepli og þarf að taka á þeim,“ segir Sigmundur og nefnir sem dæmi húsnæðismálin og heilsu ungmenna. 

Miðflokkurinn hefur verið að mælast með gott fylgi á síðustu mánuðum. Spurður hvort hann finni fyrir auknum áhuga ungs fólks á flokknum svarar Sigmundur játandi.

„Straumur ungs fólks til okkar hefur verið að aukast jafnt og þétt. Bæði strákar og stelpur. Það er gríðarlega hvetjandi að upplifa það.“

• Blogga um frétt