Ekið á tvo unga drengi: Annar fluttur á sjúkrahús

Annasamt var hjá lögreglunni á höfuðborgarsvæðinu í dag, einkum í útköllum tengdum umferðaróhöppum.

Var lögregla í tvígang kölluð út vegna ákeyrslu á fótgangandi börn, en um er að ræða tvö ótengd atvik.

Fluttur á sjúkrahús

Annað atvikið var tilkynnt til lögreglustöðvar 4, sem sinnir verkefnum í Grafarvogi, Mosfellsbæ og Árbæ, þar sem ökumaður bifreiðar ók á ungan dreng. Hlaut drengurinn áverka á fæti og var í kjölfarið fluttur til skoðunar á sjúkrahús.

Lögregla gerði viðeigandi ráðstafanir í kjölfarið þar sem óskað var eftir því að öryggi yrði bætt á gatnamótunum þar sem slysið varð.

Átti svipað atvik sér stað í umdæmi lögreglustöðvar 2, sem sinnir störfum í Hafnarfirði, Garðabæ og á Álftanesi. Var þar einnig ekið á ungan dreng en að sögn tilkynnanda voru áverkar drengsins minni háttar.

Frétt af mbl.is

Ekið á átta ára dreng

Fjarlægðu skráningarmerki bílsins

Var einnig tilkynnt um umferðaróhapp þar sem tjónvaldur ók af vettvangi án þess að grípa til viðeigandi ráðstafana. Hafði lögregla upp á viðkomandi skömmu síðar og var málið afgreitt á vettvangi.

Annar ökumaður var stöðvaður við akstur vegna gruns um akstur undir áhrifum og án ökuréttinda. Voru skráningarmerki ökutækisins fjarlægð þar sem ekki hafði verið staðið við skil á tryggingum. Ökumaðurinn var látinn laus að blóðsýnatöku lokinni.

Lögregla minnir bílstjóra á að gæta betur að akstri í minnkandi dagsbirtu á morgnana og seinnipart dags. Við slíkar aðstæður séu auknar líkur á að ökumenn sjái gangandi vegfarendur illa t.d. þegar börn eru á leið til skóla á morgnana.

• Blogga um frétt