„Við fjölskyldan erum endalaust þakklát“

Hver er að verða síðastur að tryggja sér miða á góðgerðartónleika til minningar um Bryndísi Klöru Birgisdóttur sem lést í kjölfar árásar á Menningarnótt. Ríflega 90% miða hafa selst. 

All­ur ágóði renn­ur beint í minn­ing­ar­sjóð Bryn­dís­ar Klöru en vernd­ari sjóðsins er Halla Tóm­as­dótt­ir for­seti Íslands.

Hef­ur Halla boðað komu sína á tón­leik­ana og mun hún halda ávarp undir lok þeirra.

Góðgerðarráð nemendafélags Verslunarskóla Íslands stendur fyrir tónleikunum sem haldnir eru í Háskólabíói í kvöld.

Þegar þetta er skrifað eru örfáir miðar eftir og um að gera fyrir áhugasama að tryggja sér miða sem fyrst. 

Ómetanlegt til að heiðra minningu Bryndísar

Birgir Karl Óskarsson, faðir Bryndísar Klöru, er afar þakklátur fyrir framtakið. 

„Við fjölskyldan erum endalaust þakklát góðgerðarráðinu fyrir þetta glæsilega framtak,“ segir hann í samtali við mbl.is.

„Við erum líka rosalega þakklát tónlistarfólkinu sem kemur fram í kvöld og öllum þeim sem eru að hjálpa til við tónleikana úr ýmsum áttum. Okkur finnst þetta ómetanlegt til að heiðra minningu Bryndísar og styðja við mikilvægt málefni sem minningarsjóður Bryndísar mun sinna,“ segir Birgir. 

Einvalalið tónlistarfólks 

Háskólabíó tekur 970 manns í sæti og yfir 90% miða hafa verið seldir nú þegar.

Á tónleikunum koma fram Friðrik Dór, GDRN, Aron Can, Bubbi Morthens og Páll Óskar. Þá verður Ragnhildur Steinunn Jónsdóttir kynnir á tónleikunum.

Frétt af mbl.is

Minningartónleikar um Bryndísi Klöru

• Blogga um frétt