Íbúakosning verður haldin í Hafnarfirði fari svo að Coda Terminal og Hafnafjarðarbær ná samningum um að fyrirtækið dæli innfluttum koltvísýringi niður í jörðina.
Þetta kom meðal annars í kvöld fram í máli Orra Björnssonar bæjarfulltrúa Sjálfstæðisflokksins og Valdimars Víðissonar bæjarfulltrúa Framsóknarflokksins í bæjarstjórn Hafnafjarðar. Heyra mátti á þeim að ekki væri farið að hylla undir að samningar náist milli framkvæmdaaðila og sveitarfélagsins.
Íbúafundur var haldin í Bæjarbíói í Hafnarfirði í kvöld undir yfirskriftinni: Breytingar á aðalskipulagi Hafnafjarðar og deiliskipulagsverkefnum vegna Coda Terminal.
Coda Terminal er fyrirtæki á vegum Carbfix. Fyrirtækið hyggst koma upp tíu borteigum nálægt íbúabyggð í Hafnafirði svo hægt sé að dæla innfluttum koltvísýringi niður í jörðina en talsvert hefur verið fjallað um málið hér á mbl.is.
Á fundinum voru breytingar á aðalskipulagi og deiliskipulagi kynntar.
Borteigarnir eru í einhverjum tilfellum nærri Vallarhverfinu en margir íbúar eru uggandi um áhrifin sem starfsemin kann að hafa. Bæði varðandi umhverfismál en einnig fasteignaverð og fleira.
Fundurinn var líflegur og vel sóttur en salurinn var fullur þegar mest var. Ýmsar spurningar brunnu á íbúum um skipulagsmálin, og verkefnið sjálft, sem kjörnir fulltrúar, sviðsstjóri skipulagssviðs, fulltrúar frá Carbfix og EFLU svöruðu.