Harðari barátta um hvert sæti í Norðvestur
Setja bókamerki
/frimg/1/52/34/1523496.jpg)
Helsta breytingin á framboðslistum í Norðvesturkjördæmi fyrir komandi alþingiskosningar er að Þórdís Kolbrún Reykfjörð Gylfadóttir utanríkisráðherra hefur flutt sig þaðan yfir í Suðvesturkjördæmi. Þá hefur Bjarni Jónsson, sem var þingmaður VG í kjördæminu, sagt skilið við flokkinn.
Þetta hefur valdið því að barist verður um oddvitasæti á lista Sjálfstæðisflokksins, auk þess sem barátta verður um efstu sætin í Framsóknarflokknum. Enn er óvíst með framboð hjá Samfylkingunni.
Í dag eru þingmenn kjördæmisins átta, þar af tveir jöfnunarþingmenn. Vegna mannfjöldaþróunar færist einn jöfnunarþingmaður frá kjördæminu og verður aðeins einn slíkur í þessum kosningum og heildarfjöldi þingmanna því sjö. Því er ljóst að baráttan um hvert sæti harðnar í þetta skiptið.
Í dag eiga Framsóknarmenn þrjá þingmenn, Sjálfstæðisflokkur tvo þingmenn og Vinstri Græn, Flokkur fólksins og Miðflokkurinn einn þingmann hver flokkur.
Sjálfstæðisflokkurinn
Teitur Björn Einarsson og Ólafur Adolfsson munu berjast um oddvitasætið í Sjálfstæðisflokknum í Norðvesturkjördæmi í kosningunum eftir að plássið losnaði við brotthvarf Þórdísar Kolbrúnar.
G. Sigríður Ágústsdóttir sækist eftir öðru sætinu auk Björns Bjarka Þorsteinssonar, en hann tilkynnti framboðið nú í kvöld. Hann er í dag sveitarstjóri í Dalabyggð. Á meðan sækist Auður Kjartansdóttir eftir því þriðja á lista flokksins.
Fyrirhugað er að kjósa um fyrstu fjögur sætin á kjördæmisþingi í Borgarnesi sunnudaginn 20. október.
Samfylkingin
Óljóst er hverjir bjóða sig fram fyrir Samfylkinguna í Suðvesturkjördæmi. Uppstilling verður hjá flokknum og er reiknað með því að listinn yfir frambjóðendur verði gerður opinber um miðja næstu viku. Kjördæmisráðsfundur verður síðan haldinn fimmtudaginn 24. október þar sem listinn verður endanlega samþykktur.
Framsóknarflokkurinn
Þingmennirnir Stefán Vagn Stefánsson, Lilja Rannveig Sigurgeirsdóttir og Halla Signý Kristjánsdóttir sækjast öll eftir sætum ofarlega á framboðslista Framsóknarflokksins. Kjördæmaþing verður haldið á morgun, laugardag, þar sem lögð verður fram tillaga um uppstillingu. Viku síðar, 26. október, er stefnt á að kynna listann á aukakjördæmaþingi.
Viðreisn
María Rut Kristinsdóttir hefur hug á því að leiða lista Viðreisnar í Norðvesturkjördæmi. Uppstilling verður hjá flokknum og er reiknað með því að uppstillinganefndir ljúki störfum í næstu viku.
Miðflokkurinn
Bergþór Ólason, annar tveggja þingmanna Miðflokksins, gefur áfram kost á sér til þingsetu. Uppstillingarnefnd flokksins er annars að störfum og kemur það líklega í ljós á morgun hverjir verða á listanum.
Flokkur fólksins
Eyjólfur Ármannsson sækist eftir efsta sæti Flokks fólksins. Reiknað er með því að stjórn flokksins ákveði á næstu dögum hverjir skipa helstu sæti á listanum.
Píratar
Prófkjör verður hjá Pírötum og hefjast kosningar 20. október. Þeim lýkur tveimur dögum síðar en sex eru í framboði í kjördæminu.
VG, Sósílistar og Lýðræðisflokkurinn
Uppstilling verður hjá Sósíalistaflokknum og listar verða kynntir fyrir 30. október. Einnig verður uppstilling hjá Vinstri grænum, en ekki náðist í formann kjördæmaráðs flokksins við vinnslu fréttarinnar.
Uppstilling verður hjá Lýðræðisflokknum og gert er ráð fyrir að tilkynnt verði um efstu menn á morgun, laugardag.
Erindi ríkisstjórnarinnar var komið á endastöð
„Skelfileg hungursneyð“ á Gasa
Borgarstjórinn baðst afsökunar
Hvað er að gerast í Suðurkjördæmi?
Varð brugðið þegar hún sá upphæðina
Alma Möller í framboð fyrir Samfylkinguna
Senda reglulega ábendingar vegna lyfjaávísana
