Jón Gunnarsson, fyrrverandi ráðherra, mætir Þórdísi Kolbrúnu Reykfjörð Gylfadóttur, utanríkisráðherra og varaformanni Sjálfstæðisflokksins, í pólitísku einvígi í nýjasta þætti Spursmála. Var þetta í fyrsta sinn sem þau Jón og Þórdís mættust eftir að hún tilkynnti um framboð sitt, en bæði ætla þau sér annað sætið á lista Sjálfstæðisflokksins í Kraganum.
Þátturinn var sýndur hér á mbl.is fyrr í dag. Upptöku af honum má sjá í spilaranum hér að ofan, á Spotify og YouTube og er hann öllum aðgengilegur.
Til að ræða helstu fréttir vikunnar og nýjustu vendingar á vettvangi stjórnmálanna mættu þau Stefán Pálsson, sagnfræðingur og varaborgarfulltrúi Vinstri Grænna, og Sonja Lind Estrajher Eyglóardóttir, aðstoðarmaður heilbrigðisráðherra, í settið.
Þá fór Andrés Magnússon, fulltrúi ritstjóra á Morgunblaðinu, yfir nýjustu tölur í skoðanakönnun Prósents sem benda til mikillar fylgisbreytingar eftir að upp úr ríkisstjórnarsamstarfinu flosnaði um síðastliðna helgi.
Að vanda var Hermann Nökkvi Gunnarsson blaðamaður Morgunblaðsins með upplýsandi innslag um stöðuna í pólitíkinni vestanhafs. Þar bítast Donald Trump og Kamala Harris um forsetastólinn og virðist verulega mjótt á munum á fylgi þeirra.
Ekki missa af spennandi og upplýsandi samfélagsumræðu í Spursmálum alla föstudaga klukkan 14 hér á mbl.is.