Rýma þurfti Leifsstöð á áttunda tímanum í morgun eftir reykur barst frá samlokugrilli á veitingastað handan öryggisleitar.
Guðjón Helgason, upplýsingafulltrúi Isavia, segir í samtali við mbl.is að eldur hafi ekki kviknað í flugstöðinni.
Hann segir að reykurinn hafi farið upp í loftræstikerfið sem varð þess valdandi að skynjarar námu hann. Í kjölfarið fór brunaboð í gang og þar af leiðandi ákveðið ferli.
Rýmingin stóð aðeins yfir í tíu mínútur.
Að sögn Guðjóns hafði atvikið ekki áhrif á ferðir fólks eða flugfélögin með neinu hætti.
Fréttin var uppfærð með upplýsingum frá Guðjóni klukkan 10:45.