Annan daginn í röð var fátt um svör hjá sakborningunum í Sólheimajökulsmálinu. Þrír sakborningar hafa gefið skýrslu það sem af er degi.

Karl Ingi Vilbergsson saksóknari bar fjölda skilaboða undir ákærðu sem virðast tengjast fíkniefnasölu. Svörin sem bárust voru að mestu „ég kýs ekki að tjá mig“ og „ég kannast ekki við þetta“.

Málið er um­fangs­mikið og flókið. Sak­born­ing­arnir eru 15 tals­ins og grunaðir um inn­flutn­ing, vörslu, sölu og dreif­ingu fíkni­efna.

Tvær konur og einn karlmaður komu fram fyrir dómi í morgun. Þau játuðu öll vörslu fíkniefnanna en neituðu að hafa tekið þátt í skipulagðri brotastarfsemi.

Yfirgaf dómsal strax

Fyrst til að koma fram fyrir dómi var kona á fimmtugsaldri sem játaði vörslu 50 stykkja af Rohypnol, rúmlega 10 gramma af amfetamíni og kókaíni og nokkra gramma af MDMA sem fundust á heimili hennar í febrúar.

Hún lagði mikið upp úr að hylja andlit sitt í dómsal, neitaði að tjá sig og yfirgaf salinn um leið og skýrslutöku lauk.

Frá þingfestingu málsins í ágúst. mbl.is/Eyþór

Geymdi fíkniefni útaf kvíða

Þar næst kom kona á fertugsaldri fram í fjarfundarbúnaði. Hún neitaði að hafa stundað fíkniefnaviðskipti. 

Hún játaði vörslu tæplega hálfs kílós af amfetamíni og kókaíni. Hún sagðist hafa verið að geyma fíkniefnin fyrir annan einstakling sem hún neitaði að tjá sig um. Þá sagðist hún hafa geymt efnin vegna kvíða.

Konan sagðist hafa kynnst Jóni Inga Sveinssyni, höfuðpaur málsins, í gegnum AA samtökin.

Frétt af mbl.is

„Annaðhvort þetta eða vændi“

Segist ekki tengjast konu sem hún borðaði með

Spurð út í tengsl við konu sem kom fram fyrir dómi í gær, og á móður sem er einnig sakborningur í málinu, sagðist konan ekki vilja tjá sig.

Hún og áðurnefnd kona fóru út að borða með nokkrum sakborningum í miðbænum í apríl á síðasta ári.

Á síma konunnar fundust myndir af konunum frá umræddu kvöldi. Hún kaus að tjá sig ekki um myndirnar.

Í skilaboðum þeirra á milli daginn eftir stóð: „Skil ekki hvað þess­ir menn eru að ráða okk­ur í vinnu.”

Hin svar­ar: „Nei ég er ekki stolt af mér. Ég opnaði eina pakkn­ingu þegar ég kom heim.”

Konan kaus ekki að tjá sig um hvers vegna mennirnir hefðu ráðið þær í vinnu, né um pakkninguna sem hún á að hafa opnað.

Byggja sig upp eftir erfiða lífsreynslu

Spurð út í persónulega hagi sína sagðist konan vera í nokkrum tólf spora samtök og vera í hlutastarfi. Þá sagðist hún vera að „byggja sig upp“ eftir erfiða lífsreynslu.

Konan er einnig ákærð fyrir vopnalagabrot vegna stunguvopns sem fannst á heimili hennar í september á síðasta ári. Sagði hún það hafa verið skilið eftir heima hjá henni á tíma þar sem hún var sjálf í neyslu.

Hún sagðist ekki hafa losaði sig við hnífinn en henni fannst vopnið flott. Hnífurinn hefði ekki verið ætlaður til neins. Sagðist hún jafnframt ekki hafa vitað að um vopnalagabrot væri að ræða.

Efnin til eigin nota

Þá var komið að karlmanni á fimmtugsaldri.

Hann játaði vörslu tæplega 150 gramma af amfetamíni og 10 gramma af kókaíni.

Hann lýsti því að hann hefði verið í „bullandi neyslu“ á síðasta ári.

Maðurinn sagðist vita lítið um skipulögðu brotastarfsemina og hélt því fram að hann stundaði ekki fíkniefnasölu. Efnin hefðu verið til eigin nota.

Spurður af dómara hvort þetta væri ekki mikið magn til eigin nota. Sagði maðurinn að efnin hefðu ekki dugað honum svo lengi. Hann hefði verið í mikilli neyslu.

Skýrslutökur yfir sakborningunum halda áfram í dag. 

Tengdar fréttir

Sólheimajökulsmálið

Ekki gerlegt að sakfella eftir lýsingu í ákæru

• Fer fram á sex og hálfs ára fangelsi yfir Jóni Inga
• „Miklu meira en bara yfirmaður”
• Pottarnir límdir saman
• Geymdi peninga í frysti því hún treysti ekki syninum

» Fleiri tengdar fréttir

• Blogga um frétt