Tveir handteknir eftir hópslagsmál

Tilkynnt var um hópslagsmál við skemmtistað í miðbæ Reykjavíkur í nótt. Tveir voru handteknir á vettvangi og er málið nú í rannsókn hjá lögreglu.

Þetta kemur fram í dagbók lögreglunnar á höfuðborgarsvæðinu vegna verkefna frá klukkan 17 í gær til 5 í morgun.

Einnig var tilkynnt um slagsmál við annan skemmtistað í miðbænum en reyndust þau þó vera minni háttar.

Skorið á dekk

Þá var einn handtekinn sem er grunaður um sölu og dreifingu fíkniefna í miðbænum og var aðilinn vistaður í fangaklefa í þágu rannsóknar máls.

Einnig var tilkynnt um skemmdir á bifreið í miðbænum þar sem búið var að skera á dekk bifreiðarinnar og þá voru tveir ökumenn handteknir grunaðir um akstur undir áhrifum ávana- og fíkniefna.

Tilkynnt var um innbrot í Árbænum og er málið nú í rannsókn.

Þá kom upp eldur í vörubifreið í Grafarvogi þar sem kalla þurfti út slökkvilið sem kom og slökkti eldinn.

• Blogga um frétt