Innlent | mbl | 1.12.2024 | 0:56

Samfylkingin með 27,7% í kjördæmi Kristrúnar

Oddvitar Samfylkingarinnar fagna á kosningavöku flokksins. mbl.is/Eyþór

Samfylkingin er með 28% atkvæða í Reykjavíkurkjördæmi norður miðað við fyrstu tölur og nær fjórum þingmönnum og bætir við sig tveimur þingmönnum frá því í síðustu kosningum. Flokkurinn var síðast með 12,6%.

Auk Kristrúnar Frostadóttur, formanns flokksins og oddvita í kjördæminu nær Samfylkingin inn þeim Degi B. Eggertssyni og Þórði Snæ Júlíussyni, en Þórður hefur þó gefið út að hann muni ekki taka sæti á þingi. Fjórði á lista flokksins er fjölmiðlamaðurinn Sigmundur Ernir Rúnarsson.

Sjálfstæðisflokkurinn er með 18,7% og tvo þingmenn. Var flokkurinn áður með 20,9% en heldur þingmannafjölda sínum.

Fyrstu tölur úr Reykjavíkurkjördæmi norður kl. 00:45. Graf/mbl.is

Viðreisn fær tvo þingmenn

Viðreisn tvöfaldar næstum því fylgi sitt og er með 15,8% og tvo þingmenn, en var í síðustu kosningum með 7,7% og einn þingmann.

Flokkur fólksins nær einum þingmanni og 10,8% og hækkar sig úr 7,7% í síðustu kosningum. Það nægir þó ekki til að bæta við þingmanni.

Miðflokkurinn mælist með 7,8% og bætir við sig þingmanni, en það er Sigríður Á. Andersen, oddviti flokksins í kjördæminu.

Miðað við þessar fyrstu tölur, þegar talin hafa verið 20.793 atkvæði, eru þetta þingmenn kjördæmisins.

Kjördæmakjörnir
  · Kristrún Frostadóttir (S)
  · Guðlaugur Þór Þórðarson (D)
  · Hanna Katrín Friðriksson (C)
  · Dagur Bergþóruson Eggertsson (S)
  · Ragnar Þór Ingólfsson (F)
  · Þórður Snær Júlíusson (S)
  · Diljá Mist Einarsdóttir (D)
  · Pawel Bartoszek (C)
  · Sigríður Á. Andersen (M)
Uppbótar
  · Dagbjört Hákonardóttir (S)
  · Sigmundur Ernir Rúnarsson (S)

Landsyfirlitið sem birtist nú byggir að hluta á niðurstöðum úr skoðanakönnunum, þar til komnar eru atkvæðatölur úr öllum kjördæmum. Eftir að fyrstu tölur eru komnar úr öllum kjördæmum byggir landsyfirlitið einungis á þeim tölum sem gefnar hafa verið upp af yfirkjörstjórnum.