„Málið er einfalt“: Bendir á tollamiðlarann

„Málið er einfalt í raun,“ þannig hljómuðu varnarorð Karls Georgs Sigurbjörnssonar, sem er verjandi Snorra Guðmundssonar, kenndan við rafrettusjoppuna Póló. Snorri er ásamt Sverri Þór Gunnarssyni ákærður fyrir tollalagabrot með því að smygla inn sígarettum og vindlingum til landsins á árunum 2015-2018.

Aðalmeðferð málsins fór fram í Héraðsdómi Reykjaness í dag.

Einfaldleiki málsins snýr, að mati Karls og Sigurðar G. Guðjónssonar, lögmanns Sverris, að því að ábyrgð í málinu falli á herðar tollamiðlarans Thorship, sem hafði veg og vanda af því að gera tollskýrslur þegar tóbakið kom til landsins. Í tollskýrslum var tóbakið ýmist tilgreint sem prótein eða pappír. Er þeim Snorra og Sverri í gegnum félagið, Áfengi og tóbak ehf, fyrir vikið gert að hafa svikist um greiðslu tóbaksgjalda.

Í heild eru verslunareigendurnir sagðir hafa smyglað 120.075 kartonum af sígarettum, eða 1.200.750 sígarettupökkum og 5.400 kartonum af reyktóbaki til landsins.

Frétt af mbl.is

„Þetta er risastórt tollalagabrot“

Vill sekt upp á 1,4 milljarða

Reiknast lögreglumanni sem kom að rannsókn málsins að greiðslur tóbaksgjalda sem svikist var um hafi numið 740 milljónum króna. Gerir Ásmunda Björg Baldursdóttir, saksóknari hjá Héraðssaksóknara, þá kröfu að þeim Snorra og Sverri verði gert að greiða 1,4 milljarða til ríkissjóðs vegna meintra undanskota sinna.

Þá bendir hún á að refsiramminn sé allt að sex ára fangelsi en tekur þó fram að það gæti komið til mildunar að báðir menn hafi hreina sakaskrá. 

Í heild­ina voru flutt inn 120.075 kart­on af síga­rett­um, eða 1.200.750 síga­rettupakkar og 5.400 kart­on af reyktób­aki. mbl.is/Árni Sæberg

Deilt um fyrningu brotanna 

Báðir verjendur telja meint tollalagabrot umbjóðenda sinna fyrnd að stórum hluta. Fyrningarfrestur tollalagabrota sé fimm ár og að sá fyrningarfrestur hafi ekki verið rofinn fyrr en árið 2022 þegar sakborningarnir fengu stöðu sakbornings eða um fjórum árum eftir að síðustu brotin voru framin. Þannig eigi í raun einungis tvö þeirra meintu smyglmála sem um ræðir að hafa komið til kasta dómsins, en ekki níu eins og réttarhöldin snúast um.

Þessu mótmælir Ásmunda, sem segir mál af þessu tagi ekki fyrnast fyrr en eftir 10 ár.

Sumarbústaður og einbýlishús kyrrsett

Í ljósi umfangs brotanna gerði héraðssaksóknari kröfu á að eignir Sverris og Snorra yrðu kyrrsettar. Var það samþykkt í héraðsdómi. 

Hjá Sverri er um að ræða stórt ein­býl­is­hús í Garðabæ og lítið iðnaðar­hús­næði í Reykja­vík. Þá er farið fram á að upp­hæð sem nem­ur um 55 millj­ón­um króna verði gerð upp­tæk, en það eru fjár­munir sem fund­ust á reikn­ing­um hans, á heim­ili og í banka­hólfi. Stór hluti þess er þó 40 millj­ón­ir sem lagðar voru að veði fyr­ir 17 Rol­ex úr sem hann fékk af­hent að nýju eft­ir að sak­sókn­ari hafði hald­lagt þau við hús­leit­ina.

Í til­felli Snorra er farið fram á upp­töku á 50% eign­ar­hluta hans í sum­ar­húsi í Blá­skóga­byggð, at­vinnu­hús­næði í Stykk­is­hólmi og stóru ein­býl­is­húsi í Garðabæ. Þá hef­ur héraðssak­sókn­ari lagt hald á 133,6 millj­ón­ir í lausa­fé sem var í hans eigu, en þar af eru 12 millj­ón­ir sem lagðar voru að veði fyr­ir sjö úrum sem hald­lögð voru af héraðssak­sókn­ara á heim­ili hans.

• Blogga um frétt