Sagðist ætla að „kála“ Hafdísi
Setja bókamerki
Karlmaður sem réðst á fyrrverandi sambýliskonu sína á Vopnafirði í október er sterklega grunaður um tilraun til manndráps, eða eftir atvikum sérstaklega hættulega líkamsárás með járnkarli.
Vitni á vettvangi segir að karlmaðurinn hafi sagt við sig að hann hafi ætlað að „kála henni“.
Þetta kemur fram í gæsluvarðhaldsúrskurði yfir manninum.
Héraðsdómur hafði úrskurðað manninn í gæsluvarðhald til 10. janúar en þeim úrskurði var skotið til Landsréttar. Landsréttur hefur úrskurðað hann í gæsluvarðhald til allt að 7. janúar.
Vitni greinir frá orðaskiptum við manninn
Hafdís Bára Óskarsdóttir, brotaþolinn, sagði manninn hafa sagst ætla að „klára þetta bara“ áður en hann réðst á hana, að því er fram kemur í greinargerð héraðssaksóknara.
Greindi vitni einnig frá því að maðurinn hefði sagt rétt eftir atvikið að hann hefði ætlað að „kála henni“, er hann var spurður hvað honum gekk til.
Karlmaðurinn viðurkenndi á vettvangi að hann hefði lent í deilum við Hafdísi og ráðist að henni.
Grunaður um að hafa reynt að kyrkja hana
Karlmaðurinn er sterklega grunaður um að hafa veist að Hafdísi með járnkarli, reynt að stinga hana í kviðinn og reynt að kyrkja hana með járnkarlinum.
Í áverkavottorði frá heilsugæslunni kemur fram að brotaþoli sé með áverka á hálsi, bólgu og roði eftir áhald sem beitt var, sár í hægri lófa sem blæddi úr.
Frá 19. október hefur karlmaðurinn sætt gæsluvarðhaldi og vistun á viðeigandi stofnun.
Óttaðist um líf sitt
Hafdís steig fram í Kastljósi RÚV í vikunni þar sem hún sagði manninn hafa ráðist á sig inni í skemmu fyrir utan heimili hennar.
„Hann teygir sig í járnkallinn og ræðst á mig. Það fyrsta sem hann gerir er að reyna stinga mig í kviðinn, tvisvar eða þrisvar sinnum. Hann nær að hrinda mér í gólfið og sest ofan á mig og setur járnkarlinn yfir hálsinn á mér og þrýstir bara.“
Hún sagðist hafa óttast um líf sitt og reynt að fá manninn til að hugsa um syni hennar en þann yngri eiga þau saman.
Enginn þolenda mansalsins þáði aðstoð lögreglu
Slökkt á eldsneytisflæðinu rétt eftir flugtak
Mælir fyrir breytingum á veiðigjaldafrumvarpinu
Ólíkar skoðanir á beitingu ákvæðisins
Alvarlegt mál að beðið hafi verið um minnisblaðið
Býst við að þriðja umræða hefjist á morgun
Ríkislögreglustjóri nú á 11 stöðum í borginni