Þor­björg Sig­ríður Gunn­laugs­dótt­ir, nýr dóms­málaráðherra, seg­ir að hún hafi fengið draumaráðuneytið. Hún kveðst ekki hrædd við að taka um­deild­ar ákv­arðanir og seg­ir að strax verði farið í þá vinnu að fjölga lög­reglu­mönn­um. Hún vill skoða lagaum­gjörðina í kring­um nálg­un­ar­bann og seg­ir það ekki vera mann­rétt­indi að fá að ofsækja fólk eft­ir ástar­sam­band. 

Þetta kem­ur fram í sam­tali henn­ar við mbl.is í kjöl­far lykla­skipta upp í dóms­málaráðuneyti.

Hún seg­ir að það sé sér­stök til­finn­ing að taka við lykl­un­um að dóms­málaráðuneyt­inu en á sama tíma góð til­finn­ing.

Var þetta draumaráðuneytið?

„Hik­laust,“ svar­ar Þor­björg.

Frétt af mbl.is

Lykla­skipti: „Íhaldskon­an er með al­vöru lyk­il“

Vill hefja vinnu við að fjölga lög­reglu­mönn­um

Þor­björg seg­ir Viðreisn hafa lagt áherslu á mála­flokka sem heyra und­ir ráðuneytið og því hafi það verið heiður að fá tæki­færi til að fram­kvæma þá stefnu.

Að sögn Þor­bjarg­ar þá eru helstu áherslu­mál henn­ar í ráðuneyt­inu að finna í stjórn­arsátt­mál­an­um. Strax verði farið í það að fjölga lög­reglu­mönn­um til að mæta fjölg­un íbúa, vexti í ferðaþjón­ustu og stærri og flókn­ari verk­efn­um lög­reglu.

„Það er af ástæðu að við vilj­um fjölga í lög­gæslu, til að styðja við það að lög­regl­an nái að sinna grund­vall­ar­skyldu sinni. Sem er að tryggja ör­yggi fólks­ins í land­inu, tryggja ör­ygg­is­til­finn­ingu fólks í land­inu, tryggja þá til­finn­ingu fólks að það hafi trú á því að kerfið virki. Inn­an kerf­is­ins starfar mjög gott fólk en það þarf fleiri hend­ur,“ seg­ir Þor­björg.

Vill skoða lagaum­gjörð í kring­um nálg­un­ar­bann

Þor­björg starfaði áður sem sak­sókn­ari og þá sinnti hún fyrst og fremst kyn­ferðis­brota­mál­um. Spurð hvort það sé mála­flokk­ur sem hún muni beita sér fyr­ir sem dóms­málaráðherra seg­ir Þor­björg að hún ætli að bíða með stór­ar yf­ir­lýs­ing­ar.

Hún seg­ir þó að hún hafi skoðað lagaum­gjörðina í kring­um nálg­un­ar­bann. 

„Það eru ekki mann­rétt­indi að fá að ofsækja fólk eft­ir að ástar­sam­bandi lýk­ur. Hvort að það sé eitt­hvað þar í lög­un­um sjálf­um eða reglu­verki – ég ætla að minnsta kosti sem dóms­málaráðherra að skoða það,“ seg­ir hún og út­skýr­ir að það væri þá gert til þess að styðja við þolend­ur, sem gjarn­an eru kon­ur, sem sæta hót­un­um og of­sókn­um af hálfu fyrr­ver­andi maka.

Guðrún Haf­steins­dótt­ir, fyrr­ver­andi dóms­málaráðherra, veitti Þor­björgu lykl­ana að ráðuneyt­inu fyrr í dag. mbl.is/Ó​laf­ur Árdal

„Ákveðin vís­bend­ing um hvert við ætl­um að fara“

Dóms­málaráðuneytið tekst á við þung mál. Ákvarðanir sem dóms­málaráðherr­ar hafa tekið í gegn­um tíðina hafa oft reynst mjög um­deild­ar. Má nefna mál eins og út­lend­inga­mál.

Hvernig ætl­ar þú að tak­ast á við þessi erfiðu mál sem munu koma upp?

„Ég væri ekki í stjórn­mál­um ef ég hrædd­ist það eða teldi að all­ar ákv­arðanir þyrftu að vera vin­sæl­ar, þar held ég kannski að bak­grunn­ur minn sem sak­sókn­ari hjálpi líka,“ seg­ir hún og nefn­ir að stjórn­ar­flokk­arn­ir séu nokkuð sam­stíga í út­lend­inga­mál­um.

Hún seg­ir að breyt­ing­arn­ar á út­lend­inga­lög­um í vor hafi verið skref í þá átt að fækka sér­ís­lensk­um regl­um og hún hyggst ekki reyna að fella þær breyt­ing­ar úr gildi.

„Það er til dæm­is í stjórn­arsátt­mál­an­um klausa um það að menn sem eru dæmd­ir fyr­ir al­var­leg brot eða eru ógn við ör­yggi rík­is­ins, að þeim megi vísa úr landi. Þannig það er ákveðin vís­bend­ing um hvert við ætl­um að fara í þeim efn­um,“ seg­ir Þor­björg.

Náði að baka sör­ur með vin­kon­um

Spurð út í jó­laund­ir­bún­ing­inn viður­kenn­ir hún að hann hafi ekki al­veg verið upp á 10 í ljósi aðstæðna.

En hún náði þó að baka sör­ur með vin­kon­um sín­um á dög­un­um, sem hún seg­ir vera heil­aga hefð, og á milli funda hef­ur hún reynt að nýta tím­ann til að kaupa jóla­gjaf­ir.

Tengd­ar frétt­ir

Alþing­is­kosn­ing­ar 2024

Svandísi kross­brá yfir ákvörðun Bjarna

• Kosn­ing­arn­ar standa
• Þórður Snær mun ekki þiggja biðlaun
• Anna Rut, Svein­björn og Anna Sigrún ráðin
• Seg­ir ekk­ert um sam­töl við Dag

» Fleiri tengd­ar frétt­ir

• Blogga um frétt