Innlent | mbl | 23.12.2024 | 12:33

Leiðindaveður yfir jólahátíðina

Kort sem sýnir vindhraða að morgni jóladags (25. desember), fjólubláir og beikir litir sýna hvar verður hvassast, en grænir litir það svæði þar sem vindur verður minnstur. Kort/Veðurstofa Íslands

Spáð er leiðindaveðri yfir jólahátíðina og strax í kvöld tekur veður að versna norðan- og austanlands.

Veðurstofa Íslands segir í tilkynningu á vef sínum að í kvöld og fram á nótt verði hvassviðri eða stormur norðan- og austanlands. Gular viðvaranir vegna suðvestan hvassviðris eða storms taka gildi í kvöld (Þorláksmessu) á Vestfjörðum, Ströndum og Norðurlandi vestra, Norðurlandi eystra og Austurlandi að Glettingi. Vindhviður geta staðbundið farið yfir 35 m/s.

Frétt af mbl.is

„Nánast aftakaveður þegar hryðjurnar ganga yfir“

Gular viðvaranir vegna suðvestan storms og hríðar taka svo gildi á kvöldi aðfangadags og á jóladag á vesturhelmingi landsins. Þar má reikna með hvössum éljahryðjum og í éljunum megi búast við lélegu skyggni og að aðstæður til ferðalaga verði erfiðar. Færð getur auðveldlega spillst og sér í lagi þegar snjómokstur er af skornum skammti.

Á jóladag verða suðvestan 15-25 m/s með dimmum éljum á vesturhelmingi landsins en úrkomulítið verður á Norðaustur- og Austurlandi.