Jarðarskjálftahrina reyndist vera hönnunargalli

Inga Sæland, félags- og húsnæðismálaráðherra og formaður Flokks fólksins, segir að í stjórnarmyndunarviðræðunum hafi henni brugðið við það sem hún hélt vera jarðskjálfta en reyndist síðan vera hönnunargalli á Smiðju, nýrri byggingu Alþingis.

Þessu greinir Inga frá í ára­móta­grein sinni sem birt­ist í Morg­un­blaðinu í dag.

Hún segir að hönnunargallinn valdi því að fundarherbergin á fimmtu hæð titri í hvert sinn sem strætisvagnar eða önnur stór ökutæki aka yfir hraðahindrunina í Vonarstræti framan við bygginguna.

„Til gamans má geta þess að titringur þessi olli töluverðum áhyggjum þegar Volodimír Selenskí Úkraínuforseti heimsótti Ísland og fundaði með utanríkismálanefnd þingsins í sama fundarherbergi. Ekki er öll vitleysan eins.“

Inga setur þetta í samhengi við að fréttir sem sérfræðingar fjármálaráðuneytisins báru þeim „voru ekki í neinum takti við digurbarkalegar yfirlýsingar fráfarandi ríkisstjórnar um hið góða bú“.

„Afkomuhorfur ríkissjóðs eru verri en áætlað var og ekki er útlit fyrir að jafnvægi náist í ríkisbúskapnum á næstu árum nema með boðaðri ráðdeild og styrkri stjórn nýrrar ríkisstjórnar.“

Inga segir það fyrsta verk ríkisstjórnarinnar að ná stöðugleika í efnahagslífi og stuðla að lækkun vaxta. 

Grein­ina má lesa í heild sinni í Morg­un­blaðinu í dag.