Eitt hæsta eldsneytisverðið hér

Þá er verð á lítra af dísilolíu einungis hærra í Hong Kong en á Íslandi.

Á lista vefjarins var verð á bensínlítra skráð jafnvirði 306 króna hér á landi og verð á dísilolíulítra jafnvirði 314 króna þann 30. desember. Verð á eldsneyti hækkaði um áramótin vegna hækkunar á eldsneytisgjaldi og kolefnisgjaldi en þær hækkanir eru ekki komnar inn í þennan útreikning. Þess má geta að hæsta skráða bensínverðið á höfuðborgarsvæðinu er nú 323,30 krónur og hæsta verðið á dísilolíu er 329,10 krónur.

Meðalverð 171,5 kr.

GlopalPetrolPrices segir að meðalverð á bensínlítra í heiminum sé um það bil 1,23 dalir, sem svarar til 171,50 króna, og meðalverð á dísilolíulítra sé 1,17 dalir, jafnvirði rúmlega 163 króna. Hins vegar sé mikill munur á verði milli landa þótt þau hafi öll aðgang að sama verðinu á alþjóðlegum mörkuðum. Munurinn skýrist einkum af mismunandi opinberum gjöldum eða niðurgreiðslu.

Að jafnaði sé eldsneyti dýrara í ríkari löndum og í löndum sem framleiða og flytja út olíu sé verðið að jafnaði lægra. Það á þó ekki við um olíuríkið Noreg þar sem verð á eldsneyti er með því hæsta í heiminum. Þá eru Bandaríkin einnig undantekning frá þessari reglu þar sem eldsneytisverð er að jafnaði lágt.

Vefurinn birtir einnig lista yfir raforkuverð í löndunum 168. Þar er Ísland í 63. sæti en hæst er raforkuverðið á Bermúda og Cayman-eyjum.

Lesa má nánar um málið í Morgunblaðinu í dag