Hildur Sverrisdóttir, þingflokksformaður Sjálfstæðisflokksins, kveðst munu sakna Bjarna Benediktssonar, fráfarandi formanns og þingmanns flokksins.

„Þetta eru auðvitað risastór tíðindi fyrir okkur í þingflokknum, fyrir Sjálfstæðisflokkinn og fyrir samfélagið allt. Bjarni Benediktsson er einn stærsti máttarstólpi íslenskra stjórnmála,“ segir Hildur í samtali við blaðamann mbl.is.

Bjarni tilkynnti samflokksmönnum sínum um ákvörðunina á þingflokksfundi í dag og segir Hildur ákvörðunina hafa komið sumum í opna skjöldu, þar á meðal sér sjálfri. Nokkur tár hafi fallið á fundinum er Bjarni tilkynnti tíðindin.

Frétt af mbl.is

Bjarni hættir á þingi og fer ekki í formannskjör

„Ég mun sakna hans“

„Það lá fyrir að hann væri að íhuga hvað hann hygðist gera en mér var samt brugðið við að heyra ákvörðunina, kannski sér í lagi að hann ætli ekki að taka þingsætið og þetta var því hans síðasti þingflokksfundur.“

Segir Hildur tilfinningarnar sínar blendnar að þurfa að kveðja samstarfsfélaga sinn til margra ára. Hún og aðrir flokksmenn búi vel að og hafi notið mikils góðs af samstarfinu með Bjarna sem hafi tileinkað sér ákveðna nálgun og sýn sem flokkurinn taki með sér inn í verkefni framtíðarinnar.

„En ég mun sakna hans gríðarlega mikið. Hann er framúrskarandi stjórnmálamaður og hans verður saknað.“

Frétt af mbl.is

Hildur áfram þingflokksformaður

Ekki leitt hugann að breyttri hlutverkaskipan

Spurð hvort henni sjálfri gæti hugnast að sækjast eftir formannssætinu kveðst Hildur ekki hafa leitt hugann að því.

„Bjarni gerði það að tillögu sinni við þingflokkinn að ég myndi áfram gegna þessari stöðu og var það samþykkt og ég þakka það traust. En ég hef ekkert leitt hugann að frekari hlutverkaskipan í flokknum.“

Spurð hvort hún hafi gert sér einhverjar hugmyndir um hver arftaki Bjarna gæti orðið kveðst Hildur ekki ætla að fara að spá fyrir um það að svo stöddu.

„Sjálfstæðisflokkurinn er heppinn að því leyti að það eru margir með mikla hæfileika sem gætu hugsað sér að láta til sín taka. En eigum við ekki bara að sjá hvernig því vindur fram?“

Tengdar fréttir

Bjarni hættir

Fylgist spennt með því hver tekur við af Bjarna

• Hefði viljað fá að starfa með Bjarna
• „Einn fremsti stjórnmálamaður sem við höfum átt“
• Veðbankar blanda sér í formannsslaginn
• Tekur ekki ákvörðun á þessum tímapunkti

» Fleiri tengdar fréttir

• Blogga um frétt